भांगरभूंय | प्रतिनिधी
इफ्फींत ओंपलीं आर्गां
पणजी: अभिनेते धर्मेंद्र हे एक प्रतिश्ठीत अभिनेते तशेंच एक असादारण व्यक्तीमत्व आशिल्ले. ते रुपेरी पड्ड्या वेल्या तेजस्वी नखेत्रां पैकीं एक आशिल्ले. आपले जिणेंत तांणी सदांच हेर लोकांक आनंद दिवपाचें काम केल्ल्याचें मत चित्रपट दिग्दर्शक राहुल रवैल हांणी केलें.
मंगळारा 56व्या आंतरराष्ट्रीय चित्रपट महोत्सवांत (इफ्फी) धर्मेंद्र हांकां आर्गां ओंपलीं. ह्या वेळार एनएफडीसीचे वेवस्थापकी संचालक प्रकाश मगदूम हाजीर आशिल्ले.
राहुल रवैल हांणी धर्मेंद्र हांच्यो भावनीक यादी ताज्यो केल्यो. तांणी म्हणलें, धर्मेंद्र हे भारतीय सिनेमळा वेले लोकप्रीय आयकॉना पैकीं एक आशिल्ले.
ते फक्त अभिनेतो न्हय जाल्यार एक निर्मातो लेगीत आशिल्ले. सिनेमळान एक व्हड मनीस व्हगडायला. धर्मेंद्र हांचे सारके आयकॉन काम करीत आसतना आमी ते पळोवंक शकले हें आमचें भाग्य. एक बरें व्यक्तीमत्व, एक प्रीय कलाकार आनी अतुलनीय दिलदार मनीस म्हूण धर्मेंद्र हांचें दायज भारतीय सिनेमळा वेल्या काळजांत कायमचे कोरांतून उरतलें.
तांणी म्हणलें, हांव राज कपूर हांच्या ‘मेरा नाम जोकर’ सिनेमांत सहाय्यक दिग्दर्शक म्हूण काम करतालो. ह्या सिनेमांत धर्मेंद्र हांणी ट्रॉपीझ कलाकार महेंद्र कुमार हांची भुमिका समर्पणान साकारिल्ली. ‘आदमी और इन्सान’ ह्या सिनेमाच्या शुटिंगे वेळार धर्मेंद्र म्हयनोभर सद्दां सांजवेळा विमानान दिल्ली वताले. थंय ते फांतोडेर 5 वरां मेरेन शुटींग करताले आनी उपरांत मुंबयंत परतून येताले. हें कठीण वेळापत्रक तांणी काटेकोरपणान पाळ्ळें.
धर्मेंद्र हांचो पूत सनी देओल हांचो बेताब हो पयलो सिनेमा आशिल्लो. काश्मीरांत शुटींग सुरू आसतना धर्मेंद्र हांची एक झलक पळोवपा खातीर लोक व्हड संख्येन जमताले. सिनेमा प्रदर्शीत जाले उपरांत ते खूबशे दीस सद्दां सांजवेळा वांद्रे पश्चीम हांगासरल्या गेटी सिनेमांत आपल्या पुताचो पयलो सिनेमा पळयताले. ताचे उपरांत ते म्हज्या घरा येवन सिनेमा विशीं चर्चा करताले. ते सद्दां जणू पयलेच फावटी सिनेमा पळयत आशिल्ले प्रमाण त्या सिनेमाचेर चर्चा करताले. तांचे चले तांचे व्हड दायज मुखार व्हरतात अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
