धर्मीक संबंध नासतना बरीं मुल्ल्यां भुरग्यांक दिवंचीं

भांगरभूंय | प्रतिनिधी

शिक्षणांतल्यान भुरग्यांक मानसीक उदरगती बराबर शारिरीक आनी आत्मीक विकास करपाक वावुरपाची गरज आसा. शिक्षण भुरग्यांचो फुडार घडयता हातूंत मातूय दुबाव ना. पूण आमच्या शिक्षणांत भुरग्यांचो फुडार घडोवपाक जाय. त्यो सगळ्यो सवलतीं आसात काय? पुस्तकांतलें शिक्षण दिलें म्हूण भुरग्यांचो उकल जायना. सर्व वाठारांनी भुरग्यांचो उकल करतलो जाल्यार भुरग्यांक पुस्तकांतल्या शिक्षणा शिवाय दुसरें शिक्षण दिवप खूब गरजेचें आसा.
सर्व वाठारांनी भुरग्यांचो उकल
शिकोवप्यांचो सर्व वाठारांनी भुरग्यांचो उकल करप म्हणल्यार कितें? शिक्षणा वरवीं भुरग्यांचो मानसीक, शारिरीक, भावनीक आनी आत्मीक उकल जावंक जाय. तेन्नाच आमच्यांनी शिकोवप्यांचो सर्व वाठारांनी उकल जाता म्हूण छाती फुलोवन सांगूं येता. आमचीं इश्कोलां जें शिक्षण दितात. तातूंत आमच्या भुरग्यांचीं मानसीक, भावनीक, शारिरीक आनी आत्मीक उदरगत जाता काय?
मानसीक उदरगत
आमच्या जायत्या इश्कोलांनी शिक्षक फकत पुस्तकांतल्यान जें कितें शिकूंक जाय. तेंच शिकयता. भुरग्याक परिक्षेक तयार करपाचो तांचो हेतू आसता. आवय- बापायकूय तेंच जाय आसता. ‘सिलेबसांत’ जें कितें शिकोवपाचें आसा, तें केन्ना काय सोंपोवंक जाय अशें तांकां दिसता. हाचे खातीर भुरग्यांक दीस रात अभ्यास, अभ्यास आनी अभ्यास. दुस-या उतरांनी आमचे शिक्षक फकत भुरग्यांचे मानसीक उदरगतीचेर भर घालतात.
शारीरिक उदरगत
भोव थोड्या प्रमाणान भुरग्यांचो शारिरीक उकल करपा विशीं आमच्यो शाळा भर घालता. भुरग्यांक तांच्या वर्गांनी दिसाक 8 तास आसता. म्हणचें सोमार तें शेनवार पर्यांत 48 तास आसतात. हातूंतले 4 वा 5 तास फिजिकल एज्युकेशन हाचें आसता. भुरग्यांचें शिक्षण बरें जातालें. जाल्यार तांची कूड भलायकेन सुडसुडीत आसपय खूब म्हत्वाचें आसा. कूड भलायकेन अखंड करतले जाल्यार वेंयाम करपाची गरज आसा. त्या खातीर पी. टी. सारके विशय आनी तरेकवार खेळ जशे परीं फुटबॉल, व्हॉलीबॉल, क्रिकेट आदीं खेळोवंक भुरग्यांक उत्तेजन दिवप सारकें म्हत्वाचें आसा. पूण दुर्दैवान आमच्या इश्कोलाचे वडील आनी भुरग्यांचे आवय बापूय भुरग्यांक खेळपाक फावो तो वेळ दिवंक फाटीं सरता. प्रभावीत शिक्षण दितलो. जाल्यार तांचे शारिरीक उदरगतीक तितलेंच म्हत्व दिवंक जाय म्हूण ते आजून जायना. एक भुरगो भेस बरो शिकलो. ‘ डिस्टींगशन ’ मेळयलें. इश्कोलांत आनी कॉलेजींत तो पयलो आयलो. पूण ताची भलायकी तर इबाडिल्ली जाल्यार त्या शिक्षणाचो उपेग कितें?
भावनीक उदरगत
आयच्या काळार भुरग्यांच्या भितर मोठ्या प्रमाणान उर्मटपण भितर सरिल्लें आसा. त्या खातीर आयचे तरणाटे आपल्या वडिलांक रेस्पेंत आनी मान दिनात. आयच्या भुरग्यां भितर शिस्त म्हणटात ती ना. आयचे तरणाटे रोखडेच झगपाक फुलतात. मारामारी करतात आनी रगतां व्हांवयतात. हिंसा तांच्या सबावांत रिगल्या म्हणल्यार फट जावची ना. ह्याच खातीर आयज खिणा-खिणाक चोरयो, खून आनी बलात्कार जातात ते पळयतात. हाचें खातीर मुखेल कारण म्हणल्यार आमचें शिक्षण भुरग्यांचो भावनीक उकल करूंक जैतिवंत जावंक ना. त्या खातीर भावनीक कल खूब गरजेचो.
आमच्या शाळांनी संस्कृतीक कार्यावळीं घडोवन हाडप खूब म्हत्वाचें आसा. सगल्या समाजांच्यो वेग-वेगळ्यो कार्यावळीं भुरग्यां लागीं करून घेवप गरजेचें आसा. साबार जातीचे आनी धर्माचे भुरगे सगळे एकवटान रावन, जेन्ना कार्यांवळीं घडोवन हाडटात. तेन्ना भुरग्यांच्या मनांत भावनीक बदल जावपाची शक्यताय आसता. ही संद वगडावंक फावना. त्या खातीर संस्कृतीक कार्यांवळींनी भुरग्यांक वांटो घेवंक उत्तेजन दिवप फायद्याचें जावन आसा. पूण आमचीं इश्कोलां हे घडणेक फावो तितलें म्हत्व दिनात म्हूण दुख्ख भोगता. ह्या काळार आमी जायत्यो आकांतवाद्यांच्यो खबरी आयकतात. तातूंतले कांय तरणाटे बरे शिकिल्ले आनी हुशार भुरगे आसात. पूण तांचो भावनीक उकल ना जाल्ल्यान कारणान ते आकांतवादी जाल्यांत असल्या शिक्षणाक शिक्षण म्हणटले व्हय?
आत्मीक उदरगत
आमी आमच्या शिक्षणांतल्यान भुरग्यांक व्हड व्हड शिक्षण दिलें. तांकां आदोवगाद , दोतोर, इंजिनियर, संशोदक आदीं केल्यांत. तांणी खूब नामनां मेळयलीं. पूण मनीस करूंक जर शकले ना. जाल्यार त्या शिक्षणाक कसलेंच म्हत्व ना. त्या खातीर मुल्ल्याधिश्ठींत शिक्षण दरेक विशय ताचेर थीरपणी विचार करप सामकें गरजेचें आसा. कसलोच धर्मीक संबंध नासतना बरीं मुल्ल्यां भुरग्यांक दिवंक जाय. हें करपाक हो विशय सक्तीचो आसूंक जाय. ‘Value are not tought but they are caught.’ म्हणल्यार मुल्ल्यां शिकोवंक जायना. तीं भुरग्यांनी मेळोवन घेवंचीं पडटात. खरें ते. त्या खातीर आमचे शिक्षक हेय रॉल मॉडेल आसपाची गरज आसा. म्हज्या नदरेंतल्यान आयची काळाची गरज
दोळ्या सामकार दवरून मुल्ल्यांधिश्ठींत हो विशय सक्तीचो करचो.
(लिप्यांतर- विशाल खांडेपारकार, मो. 8080622370)

तोमाझिन कार्दोज
कांदोळी