भांगरभूंय | प्रतिनिधी
लाहोर, खबरां संस्था : सोशल मिडियाचेर धर्मीक भावनां दुखोवपी पोस्ट शेअर केल्ल्यान पाकिस्तानी न्यायालयान एका क्रिस्तांव नागरिकाक २२ वर्सां बंदखणीची ख्यास्त फर्मायल्या. ताच्या ह्या पोस्टाक लागून पंजाब प्रांतांतल्या अल्पसंख्यांक क्रिस्तांव लोकांच्या इगर्जांचेर आनी घरांचेर मुस्लिमानी हल्लो केल्लो. घरां लासलीं. हातूंत जायत्या जाणांचो जीव गेल्लो.
ह्या पोस्टाक लागून क्रिस्तांवांनी कुराणाचो अपमान केल्ल्याची वावडी पातळिल्ली. पंजाबाची राजधानी लाहोरा पसून १३० किलोमीटर अंतराचेर आशिल्ल्या फैसलाबाद जिल्ह्यांतल्या जरनवाला तालुक्यांतल्या मुसलमानांनी २४ इगर्जींक उजो लायिल्लो. ८० घरांकूय उजो लायिल्लो. हे घडणुके उपरांत पुलिसांनी २०० मुसलमानांक ताब्यांत घेतिल्ले. पूण तातूंतल्या कोणाचेरुच कारवाय जावंक ना. १८८ जाणांक पुरावो नाशिल्ल्यान न्यायालयान निरपराधी थारायले. जाल्यार उरिल्ले १२ जाण जामीनाचेर भायर आसात. तांचेर अजूनय खटलो सुरू आसा.
आतंकवाद विरोधी प्रकरणांचे खाशेले न्यायाधीश जैनुल्लाह खान हांणी शेनवारा अहसान राजा मसीह हाका मरणाची ख्यास्त फर्मायली. हाचे वांगडाच १० लाख पाकिस्तानी रुपयांचो दंडूय घालो. आतंकवाद विरोधी कायदो आनी इलॅक्ट्रॉनीक गुन्यांव आडावपी कायद्याच्या वेगवेगळ्या कलमां खाला मसीह हाका २२ वर्सां बंदखणीची ख्यास्त फर्मायल्या.
मजगतीं, मसीह हाणें टिकटॉकाचेर धर्मीक भावनां दुखोवपी पोस्ट शेअर केल्ली. तांच्या पोस्टाक लागून मुस्लिमांच्यो भावना दुखावल्ल्याचो आरोप जालो. एका पुलीस अधिकार्यान केल्ले कागाळीच्या आधाराचेर मसीहाक ही ख्यास्त दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
