भांगरभूंय | प्रतिनिधी
जायत्या शतमानांनी प्रतिक्षा निमाणें सोंपली आनी अयोध्येंत श्रीराम अवतरले. रामलल्ला अयोध्येंतल्या आपल्या हक्काच्या सदनांत विराजमान जाले आनी देशांतूच न्हय जाल्यार संवसारांत भाव भक्तीचो उसळिल्लो म्हासागर आमी सगल्यांनी पळयलो. रामलल्लाच्या मुर्तीची प्राणप्रतिश्ठा अयोध्येंतल्या श्रीराम मंदिरांत जाताली त्या खिणाचे काल आमी सगलेच साक्षिदार आशिल्ले. ह्या खिणाचें शब्दांनी वर्णन करप अशक्य आसा. सगलो देश राममय जाल्ल्याचें चित्र ह्या वेळार संवसारान पळयलें. राम भक्तांचे कांय शतमानां सावन सुरू आशिल्ले तपश्चर्ये उपरांत हो खीण आयिल्ल्यान संवसारांतल्या राम भक्तांक परमानंद जावप सभावीक आसा. ह्या मंदिरा कडेन राष्ट्रीय एकचाराचे प्रतीक म्हणून पळयतले. श्रीराम मंदिरांतले रामलल्लाच्या प्राणप्रतिश्ठेचो हो सुवाळो देशवासियांनी दिवाळेची परब म्हूण तर मनयलोच, पूण तो फुडले खूबशे दीस चालू आसतलो हाची कल्पना राम भक्तां मदीं पातळिल्ली उमेद, जोश पळयल्यार आमी करपाक शकतात. राम मंदीर उबारपाच्या कामांतल्यान अयोध्या नगरीचो जाल्लो कायपालट तर आतां प्रत्यक्ष दोळ्यांनी दिसपाक लागला. फुडारांत अयोध्या हें देशांतलें धर्मीक पर्यटनाचें मुखेल केंद्र जावपाक शकता. ना जाल्यार धर्मीक पर्यटनाच्या नव्या पर्वाचो अरुणोदय अयोध्येंतल्यान जावपाक लागला असो दावो आमी करपाक जाता.
अयोध्येंत श्रीराम मंदिराचे उबारणेंतल्यान जाल्लो कायापालट थंय तयार केल्लो सुसज्ज असो विमानतळ आनी आर्विल्लें रेल्वे स्टेशन हाका लागून चड करून दिसून येता. तरी वर्सा पयलींची आनी आतांची अयोध्या हातूंत जमीन मळबाचो फरक आसा हें समजून घेवपाक जाय. ह्या वाठारांत लागींच्या तेंपार देश-विदेशांतल्या पर्यटकांची सामकी रांग तर लागतलीच आनी तातूंतल्यान देशांतल्या धर्मीक पर्यटनाक नवी दिका मेळटली अशी आस्त बाळगुपाक जाता. आमच्या देशाक धर्मीक म्हत्व आसा हें जरी खरें आसलें तरी अजून धर्मीक पर्यटनाक तितलें म्हत्व दिनात ही वस्तुस्थिती मानून घेवचीच पडटा. आमचो देश विविधतायेन नटिल्लो आशिल्ल्या कारणान घडये धर्मीक पर्यटना कडेन तितलें लक्ष दिवपाक जाय आशिल्लें तितले दिनात. पूण अयोध्येंत नव्या पर्वाक जी सुरवात जाल्या आनी सगल्या संवसाराचें दोळे ह्या वाठारा कडेन लागल्यात तें पळयल्यार येवपी काळ धर्मीक पर्यटनाक नवीं उंचाय दिवपाक शकतलो असो विस्वास पर्यटन मळांतल्या दिगज्जांक आसा. मर्यादा पुरुषोत्तम प्रभू श्रीरामचंद्रान आपले अयोध्ये नगरीक एक नवे वैभव मेळोवन दिलां हे थंयच्या वट्ट बदलाक लागून संवसारा सामकार पावोवपाचें काम रामलल्लाच्या प्राणप्रतिश्ठा सुवाळ्यान केलां. अयोध्येच्या एकूण अर्थवेवस्थेक श्रीराम मंदिराक लागून कितली उभारी मेळटली हाचो अदमास आतांच बांदप कुस्तार आसा, तरी देशाचे एकूण भलायकी वेवस्थेक हें मंदीर व्हडलो हातभार लावपाक शकतलें अशें म्हणल्यार अतिताय जावची ना.
देशांतल्या धर्मीक पर्यटनाचो आदार हो मुखेलपणान चार धाम, बारा ज्योतिर्लींग, शक्ती पिठां, तिरुपती, रामेश्वर, सोमनाथ, द्वारका, कुरुक्षेत्र हांचे वांगडा अयोध्या, चित्रकूट आनी गोंयांतल्या इतिहासीक देवळां वांगडाच चर्ची आनी अशीं खूबशीं थळां आसलीं तरी अजून धर्मीक पर्यटना खातीर म्हणपाची तशी देशी विदेशी पर्यटकांची गर्दी हीं थळां ओडून घेतना दिसनात, वा सगल्याच पिरायेच्या गटांतले पर्यटक अशा सुवातांनी चडशे दिसनात. पूण अयोध्येंतली श्रीराम मंदिराची उबारणी आनी फाटल्या एक दोन म्हयन्यांत संवसारांतल्यान ह्या मंदिरा कडेन लागिल्ले दोळे, हांचो विचार केल्यार धर्मीक पर्यटन मळार येवपी काळांत चमत्कार घडला. आनी सगल्याच पिरायेच्या गटांतले पर्यटक अयोध्या आनी हेर थळांनी व्हड संख्येन दिसपाक लागल्यार अजाप दिसचें ना, इतली मोहिनी रामलल्लान संवसारांतल्या राम भक्तांचेर घाल्या. अयोध्येंत उसळिल्लो लोकांचो म्हासागर पळयल्यार पर्यटन मळाक फुडल्या कांय दिसांत वेगळोच बदल दिसून येवपाची शक्यताय न्हयकारपाक जायना. तरणाटे पिळगेक लेगीत प्रभू रामचंद्रान आकर्शीत केल्ल्याचें जें चित्र दिसता तेंवूय आस्त वाडोवपी आसा. धर्मीक पर्यटन हें फक्त जाण्ट्या लोकां खातीर आशिल्ल्याचो जो गैरसमज आसा तो ल्हवू ल्हवू पयस जावपाक लागला हाची प्रचिती आतां येवपाक लागल्या, आनी धर्मीक पर्यटनाक ताका लागून एक नवी दिका ह्या निमतान मेळपाक शकतली.
अयोध्या नगरीचें बदलिल्लें चड आकर्शक रूप स्मार्ट अयोध्या तशेंच हेर कांय येवजण्यो साकार जाले उपरांत संवसारा सामकार येतलें. पोरूं वर्सा अयोध्येक भेट दिवन आयलों तेन्ना राम मंदिराचें चालू आशिल्लें काम हांवें पळयिल्लें. तंबूतल्या रामलल्लाचें दर्शन घेवपा खातीर जी व्हड कसरत करची पडिल्ली ताचीय याद रामलल्लाच्या प्राणप्रतिश्ठा सुवाळ्या निमतान दोळ्यां सामकरा आयली. आयज दिसपी अयोध्या तीच आसा काय किदें, असोय प्रस्न हांवें आयज स्वताक विचारलाे. पूण अयोध्येचें जें परिवर्तन जालां तें मानून घेवन फुडरांतली अयोध्या हांव दोळ्या सामकार उबी करपाचो म्हजो यत्न चल्ला. आनी ती जर अजून वेगळी अयोध्या आशिल्ल्याचें हांव पळयतां. अयोध्ये पसून सामकी लागीं वैदीक सीटीची संकल्पना मूर्त स्वरुपांत येतली. देशांतल्या बावीस राज्यांनी ते सुवातेंत आपलें भवन उबारपा खातीर प्रस्ताव सादर केल्ल्याचें वाचनांत आयलें तेन्ना धर्मीक पर्यटनाच्या मळार अयोध्या जी व्हडली उडी घेतली ताची कल्पना करपाक जाता. सुमार चौदाशें एकर सुवातेंत ही वैदीक सिटी उबारपाची येवजण आसा. पर्यटकांचो ओघ सुरू जाले उपरांत उदरगतीक जो नेट मेळटलो ताचो विचार केल्यार एक मुखेल तिर्थक्षेत्र फुडल्या कांय वर्सांत अयोध्या नगरींत संवसारा सामकार येतलें आनी धर्मीक पर्यटनाचें नवें पर्व हातूंतल्यान देशांत खऱ्या अर्थान सुरू जातलें…
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
