भांगरभूंय | प्रतिनिधी
पूण आतां हे गोडसाणीक राजकारणाची नदर लागल्या आनी हे खातीर धर्मीक तणाव जावंक लागल्यात अशें म्हणल्यार अतिताय थारची ना.
एका दशका आदीं गोंयांत काँग्रेस सत्तेंत आसतना राज्यांतले ‘खुरीस’ मोडपाच्यो घडणुको खूब जाल्यो. आत्र्या- पयऱ्यान ह्यो घडणुको घडटाल्यो. हे खातीर धर्मीक तणाव खूब जातालो. हे खुरीस मोडपी हातां मेरेन गोंयचे पुलीस पावले काय तांणी त्या वेळार मानसीक स्थिती सारकी नाशिल्ल्यांक बेश्टेच ह्या प्रकरणांत घुस्पायले हें कळपाक मार्ग ना. फाटलीं धा वर्सां हे प्रकार बंद जाल्ल्यांत जमा आसा. बऱ्याची गजाल. नाजाल्यार लोकांच्यो भावना दुखत रावतात आनी आमी एकामेकांक दुबावान पळोवपाक लागतात. हो दुबाव पयस जावप गरजेचो.
आमचें गोंय म्हणल्यार शांतीतायेचें प्रतीक. म्हणल्यार आमी किरिस्तांव, हिंदू आनी मुस्लिम, एकवटान रावतात. एकामेकाल्या सणांनी वांटो घेतात, परबीं भेटयतात आनी सणांची गोडसाण चाखतात. पूण आतां हे गोडसाणीक राजकारणाची नदर लागल्या आनी हे खातीर धर्मीक तणाव जावंक लागल्यात अशें म्हणल्यार अतिताय थारची ना.
फाटल्या कांय म्हयन्यां पयलीं छत्रपती शिवाजी महाराज हांचे पुतळे मोडून उडोवपाचे प्रकार जाताले. तांचे पुतळे नवे सुवातेर बसोवपाक गेल्यार ताका विरोध जातालो. त्याच काळांत सोशल मिडियाचेर एकामेकांच्या धर्मा आड घाल्ल्या पोस्टांक लागून गोंयच्या पुलीस स्थानकांचेर कितल्योश्योच कागाळी जाल्यो. सगळें वातावरण दुशीत करून उडयिल्लें. लोकसभेची वेंचणूक लागीं पावता पावता, अशे प्रकार आनीकय वाडपाक लागले आनी कपलाक व्हडलो नाम ओडपी भायल्या राज्यांतल्या कांय वेंचीक लोकांनी अल्पसंख्यांक दुकानदारां कडल्यान कितेंच विकत घेवचें न्हय असो उलो मारलो. तांचो हो व्हिडिओ खूब वायरल जालो. शांतीकाय दुशीत करपाक वावुरपी दरेकल्याचो अभिमान जागो जालो आनी ते लोकांक तत्वज्ञानां सांगपाक लागले. पूण हें सांगतना ते आपूण ज्या पक्षांत आसा वा तेंको दिता त्या पक्षांतय अल्पसंख्यांक विभाग आसा आनी तातूंत तांचे वांगडी आसात हें घडये विसरले. हे विशीं प्रस्न विचारल्यार ते कानार केंस काडटात. ते भेड्डे जातात. तितले पुरतेच. इस्लामी देशांनी आमचे गोंयकार काम करतात, तांकां थंयच्यान धांवडल्यार सरकार तांची पोटाची वेवस्था करपाक शकतलो? तो सरकार मागीर भाजपाचो आसूं वा काँग्रेसीचो?
ह्या सगळ्या बोवाळांत जेन्ना धर्मीक तणाव चडूच वाडपाक लागलो, तेन्ना मुख्यमंत्री प्रमोद सावंत हांणी ‘कोणूय जर दुसऱ्या धर्माआड विधानां करता जाल्यार ताचेर पुलीस कारवाय जातली आनी असले प्रकार खपोवन घेवचे नात’ अशें विधान केलें. घरमंत्री ह्या नात्यान मुख्यमंत्र्यान ठोस भुमिका घेवप गरजेची आशिल्लीच. पूण तांणी आपल्या उतराक जागपाक जाय आनी दुसऱ्यांच्या धर्मा आड उलोवप्यांचेर कारवाय करपाक जाय अशी मागणी दोन दिसां सावन लोक करीत आसात. अशी मागणी करपा फाटल्यान कारण थारले ते सुभाषबाब वेलींगकार. तांणी पोरण्या गोंयच्या सां फ्रान्सीस शावियेर हांचे विशीं केल्ल्या विधानाचेर लोक पेटून उठल्यात. शुक्रारा रातीं तर लोकांनी मडगांवां रस्ते आडावन धरले आनी शेनवारची सकाळ उदेता म्हणसर थंयच बसून रावले. फकत एक मागणी घेवन, प्रा. वेलींगकाराक अटक करात म्हूण. फकत गुन्यांव नोंद करून जावचो ना, तांकां अटक करपाक जाय ही मागणी तरणाटे धरून जाण्टे पिरायेचीं महिला आनी दादले करताले. आंदोलन करपी ह्या जमावांत फकत किरिस्तांवूच लोक आशिल्ले अशें न्हय, तर हिंदू आनी मुस्लिमूय आशिल्ले. जांकां गोंयची शांतीकाय इबाडिल्ली नाका, ते गोंयकार हातांत हात घालून एकवट दाखयताले.
सां फ्रांसिस शावियर हांच्या अवशेशांच्या एक्सपोजिशनाच्या निमतान पोप फ्रान्सीस हांकां गोंयांत हाडपाचो विशय जेन्नाच्यान सुरू जाला, तेन्ना सावन शावियर हांकां लक्ष्य करपाचें कारस्थान सुरू आसा. ह्या विशया वयल्यान कांय लोक भाजप सरकाराचेर तुटून पडल्यात आनी ह्याच बोवाळांत धर्मीक तणावाचो नवो बोवाळ सुरू जाला.
हो सगळो बोवाळ मुद्दाम जावन केला असो सूर लोकां मदीं आसा. कारण कितें काय म्हणल्यार, कला अकादमींतलो कथीत घोटाळो, लाखांनी चौखण मिटर जमनींचे रुपांतरण, भ्रश्टाचार अशा मुद्द्यां वयल्यान भाजप सरकाराचेर लोक आरोप करपाक लागल्यात, आनी ह्या सगळ्या विशयां वयल्यान लोकांची नदर काडून उडोवपाक हो नवो वाद मुद्दाम जावन तयार केला अशें लोक सर्रास उलयतात.
राजकारणांत कितेंय घडटा, चोर, बलात्कारी लेगीत सत्तेंत विलीन जातात आनी तांकां ‘तत्वनिश्ट पक्ष’ येवकारय दिता. पूण ह्या सगळ्या बोवाळांत आमची रे बाबा शांतीकाय कित्याक काबार करतात?
सां फ्रांसिस शावियर हांचो सभाव कसो आशिल्लो आनी ते कितें करताले तें ह्या काळांतल्या लोकांक खबर ना. ते खातीर तांचेर आरोप करून लोकांक भडकावन घालप बंद जावंक जाय. लाखांनी लोक तांकां मानतात आनी तांच्या फेस्ताच्या दिसांनी आपल्या गांवच्यान पांयांनी पोरण्यां गोंयांत वतात. हो भावार्थ फकत किरिस्तांवांकूच न्हय, तर हेर धर्माच्या लोकांकय आसा. कोणाक मानप हाचें स्वातंत्र्य लोकांक आसा, ताका आळो घालपाचे यत्न कोणेंय केल्यार ताचेर कारवाय जावंक जाय.
लग्ना पयलींच भुरग्याक जल्माक घालपी कितलेशेच आसतले. ते खाड वाडोवन लोकांक तत्वज्ञानां सांगनात? एकदां कोणूय कोणाच्या काळजांत रिगलो म्हणटकच ताचे वाणीक लेगीत घाणी मारल्यो जाल्यार तांकां फरक पडना. ते खातीर अशा विशयां वयल्यान धर्मां मदीं वेर घालपाचे प्रकार बंद जावंक जाय. आमच्या सुंदर सोबीत गोंयची शांतीकाय, एकचार, सलोखो राखून उरपाक जाय. सरकारान बडी मारची…
दृश्टीकोन
समीर नायक
मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
