भांगरभूंय | प्रतिनिधी
भांगरभूंय । प्रतिनिधी
म्हापशेंः धर्मापूर- साश्ट हांगच्या जमीन हडप प्रकरणात विशेश तपास पंगडान (एसआयटी) दुबावीत अॅश्ली बार्बोझा (30, राय) हाका अटक केल्या. ह्या प्रकरणांत ही चवथी अटक आसून जमीन हडप प्रकरणांत एसआयटीन आतां मेरेन 28 जाणांक अटक केल्या.
जमनीचो मूळ धनी जुझे आर कॉस्ता हाच्या सोयऱ्यान आपल्या पूर्वजांची धर्मापूर हांगची सर्वे नंबर 191/4 मदली जमीन कोणे तरी हडप केल्ल्याची कागाळ साश्टीच्या मामलेदारा कडेन केल्ली. जानेवारी 2018 ते मे 2020 मजगतीं ह्या जमनीची बोगस दस्तावेज तयार करून एक चौदा उताऱ्याचेर ताचें नांव घातिल्ले अशें कागाळेंत नमूद केल्ले. मामलेदारान चवकशी केली तेन्ना सर्वे नंबर 191/4 सयत 445/1, 3/3, 390/18, 390/12, 260/1, 271/2, 290/14, 5/7 आनी 24/15 तल्या जमनीचे दस्तावेज कार्यालयांतन ना जाल्यात अशें दिसून आयलें.
मामलेदारान उपनिबंधक कार्यालयांतल्या ह्या जमनीच्या विक्री वेव्हाराची म्हायती मागयली तेन्ना सर्व्हे नंबर 191/4तल्या जमनीचे चार प्लॉट करकून ते विकिल्ल्याचें दिसून आयलें. साश्टीचो तेन्नाचो मामलेदार प्रतापराव गांवकार हाणे 29 जून 2021 दिसा फातोड्डे पुलीस स्टेशनांत कागाळ केल्या उपरांत चवकशे खातीर हें प्रकरण एसआयटी कडेन वर्ग केल्लें.
एसआयटीचो निरीक्षक सूरज सामंत हाणे चवकशी करून दुबावीत महादेव चव्हाण हांच्या नांवार हे प्लॉट आशिल्ल्यान ताका अटक केली. उपरांत यशवंत सुखठणकार आनी जमीनीचो पॉवर ऑफ अॅटर्नी आशिल्लो अब्बास अली मकंदर हाका अटक केली. मंगळाराक अॅश्ली बार्बोझाक अटक केली. जमीन हडप प्रकरणांतलो मुख्य सूत्रधार फ्लायड कुतिन्हो हाचो अॅश्ली वांगडी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
