भांगरभूंय | प्रतिनिधी
पणजी ः अंदूंचो चंद्रकांत केणी पत्रकार पुरस्कार ज्येश्ठ पत्रकार धर्मानंद कामत हांकां जाहीर जालां. हो पुरस्कार 26 नोव्हेंबराक सांजवेळा 4.30 वरांचेर पणजेच्या सरस्वती मंदिर इमारतींतल्या फोमेंतो सभाघरांत भेटयतले.
मुखेल सोयरे म्हूण आदले केंद्रीय मंत्री सुरेश प्रभू कार्यावळीक हाजीर आसतले. ज्येश्ठ पत्रकार अनिल पै हे चंद्रकांत केणी विशीं अणभव सांगतले. ह्या प्रतिश्ठीत पुरस्काराचें हें चवथें वर्स. हाचे आदीं हो पुरस्कार ज्येश्ठ पत्रकार सुरेश वाळवे, उदय भेंब्रे आनी प्रमोद प्रभुगांवकार हांकां मेळ्ळां.
धर्मानंद कामत हांकां पत्रकारितेचो 50 वर्सांचो अणभव आसा. राष्ट्रमत, वॅस्ट कोस्ट टायम्स ह्या दिसाळ्यांचे प्रतिनिधी, पुढारीचे दिल्ली ब्युरो चीफ म्हूण 25 वर्सा जाल्यार ओमन ‘डेली ऑब्जर्व्हर’ ह्या दिसाळ्या खातीर तांणी काम केलां. प्रिंट, रेडिओ आनी टीव्ही माध्यमांचो व्हड अणभव आशिल्ले धर्मानंद कामत हांणी देशभरांतल्या माध्यमां खातीर स्तंभलेखन केलां. तशेंच दिल्लींत आशिल्ल्या गोंयकारांच्या वेगवेगळ्या संघटनांचे ते पदाधिकारी आसा.
हो पुरस्कार चंद्रकांत केणी हांच्या पत्रकारितेच्या आनी समाजीक वावरांत तांकां आदार दिवपी विशिश्ट व्यक्तींक दितात. दर वर्सा मडगांवांत जावपी हो सुवाळो पयलेच खेपे पणजेंत जाता, देखून चंद्रकांत केणी हांच्या बऱ्या मागप्यांनी, पत्रकारितेच्या मळार वावुरप्यांनी आनी हेर मानेस्तांनी व्हड प्रमाणांत हे कार्यावळीक हाजीर रावचें, असो उलो आयोजकांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
