भांगरभूंय | प्रतिनिधी
खबरां संस्था ः मध्य प्रदेश उच्च न्यायालयान हालींच मुस्लीम दादलो आनी हिंदू बायल हांचे मदलें लग्न मुस्लीम वैयक्तीक कायद्या प्रमाण अवैध आसा, असो निकाल दिला. तशेंच, 1954 वर्साच्या खाशेल्या लग्न कायदो खाला लग्नाच्या वेळार सुरक्षा दिवंक मेळना अशें सांगून आंतरधर्मीय जोडप्याची याचिका उच्च न्यायालयान न्हयकारली. हे वेळार न्यायाधीश गुरुपाल सिंग अहलूवालिया हांणी सांगलें, मुस्लीम दादलो आनी हिंदू बायल हांचें लग्न मुस्लीम वैयक्तीक कायदो आनी खाशेल्या लग्न कायद्या खाला अवैध थारता.
बार अँड बेंचच्या म्हायती प्रमाण ह्या आंतरधर्मीय जोडप्यान खाशेल्या लग्न कायद्या खाला लग्न जावपा खातीर पुलीस संरक्षण मागिल्ले, पूण तें न्हयकारले. मुस्लीम कायद्या प्रमाण मुर्ती वा उज्याची पुजा करपी चलये कडेन मुस्लीम दादल्यान लग्न करप अवैध मानतात अशें उच्च न्यायालयान म्हणलां.
उल्लेख केल्ल्या प्रकरणांत हिंदू चलयेच्या कुटुंबान ह्या लग्नाक विरोध केलां. हें आंतरधर्मीय लग्न जालें जाल्यार समाजांत तांका मान मेळचो ना वा तांकां पयस करतलो असो भंय चलयांच्या पालकांक दिसता. मुस्लीम भुरग्या कडेन लग्न जावपाक भायर सरतना चलयेन आपल्या वांगडा घरांतल्यान भांगराच्यो वस्ती व्हेल्ल्याचो आरोप चलयेच्या पालकांनी केलो.
हिंदू चलयेक मुस्लीम धर्म आपणावचो ना, देखून ह्या जोडप्याक खाशेल्या लग्न कायद्या खाला लग्न जावपाची इत्सा आसा अशें ह्या जोडप्याच्या वकिलांन न्यायालयांत सांगलें. तशेंच मुस्लीम दादल्याकय आपलो धर्म बदलनासतना लग्न करपाचे आसा. देखून लग्नाची नोंदणी करपाक वतना जोडप्याक पुलीस संरक्षण जाय अशी मागणी जोडप्याच्या वकिलान याचिका वरवीं न्यायालयांत केली.
मुस्लीम लग्न कायद्या वयर आशिल्ल्या खाशेल्या लग्न कायद्या खाला आंतरधर्मीय जोडपे लग्न जावंक शकता अशेंय जोडप्याच्या वकिलांन सांगलें. पूण अशें लग्न खासा लग्न कायद्या खाला लेगीत अवैध आसा अशें उच्च न्यायालयान सांगलें. कारण चलो वा चलयेक आपलो धर्म सोडपाची इत्सा ना आनी तांका लिव्ह इन रिलेशनशिपांत रावपाची इत्सा ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
