भांगरभूंय | प्रतिनिधी
एर्नाकुलम, केरळः केरळ पुलिसांनी 23 वर्सां पिरायेची सोना एलधोस हिचो मोगी रमिस हाका तिच्या आत्महत्या प्रकरणांत अटक केल्या. शिक्षक प्रशिक्षण अभ्यासक्रम शिकपी सोनान आत्महत्या करचे पयलीं बरयल्लें चिटयेंत रमीसान तिका मारपेट करून इस्लाम धर्म आपणावपाक जबरदस्ती केल्ल्याचो आरोप केला.
पुलिसांनी दिल्ले म्हायती प्रमाण, लग्नाची नोंदणी करपाचें उतर दिवन रमीसान सोनाक आपल्या घरा व्हेली. पूण ताच्या कुटुंबान लग्ना पयलीं तिणें धर्मांतर करपाक जाय अशी अट घाली. सोनाच्या बरयिल्ल्या चिटयेचेर आदारून पुलिसांनी रमिसाचेर भारतीय दंड संहिता कायद्या खाला आत्महत्या करपाक प्रवृत्त करप आनी लग्नाच्या फटीच्या उतरा खाला लैंगीक संबंद दवरपाचो गुन्यांव नोंद केलो.
हे घडणुकेचेर प्रतिक्रिया दितना भाजपान म्हणलें, सोनाचे मरण “केरळांत जिहादी आतंकवाद पातळपाचो” पुरावो आसा.
मजगतीं, फाटल्या जूनांत उत्तर प्रदेशांतल्या प्रयागराजांतल्या एका दलीत चलयेक केरळांत व्हरुन जबरदस्तीन इस्लामांत धर्मांतर करून ‘जिहाद’ खातीर प्रशिक्षण दिवपाचो यत्न केल्लो. पिडितेची आवय गुद्दी देवी हिणें कागाळ केले उपरांत हो प्रकार उक्तडार आयिल्लो. कागाळी प्रमाण, कहकशां उर्फ दरकशा बानो हे थळावे बायलेन पयशे आनी बऱ्यो संदी दिवपाचें हांयस दाखोवन चलयेक केरळांत व्हेली. ह्या प्रकरणांत बानो आनी तिचो वांगडी कैफ हांकां अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
