भांगरभूंय | प्रतिनिधी
पणजी : धर्मांतराक आळाबंद घालपाक मुख्यमंत्री डॉ. प्रमोद सावंत जें कार्य करतात तें योग्यूच आसा. धर्मरक्षणा खातीर तांणी घेतिल्लो फुडाकार हिंदुत्वा खातीर सहाय्यक थारता. गोंयच्या इतिहासांत सेगीत 2 फावट मुख्यमंत्री जावप खूब कठीण. मात, मुख्यमंत्री सावंत हांणी आपल्या कार्यांतल्यान हो मान मेळयला. तांणी अशेंच बरें कार्य करीत रावचें. तांच्या पक्षाचीय हीच भूमिका आसा. सगल्यांक बरोबर घेवन वतनाच, धर्मांतराकूय आळाबंद घालप गरजेचें आसा, अशें दक्षीणपीठ नाणीजधाम महाराष्ट्राचे जगद्गुरू रामानंदाचार्य हांणी म्हणलें.
जगद्गुरू नरेंद्राचार्य महाराज संस्थानाच्या पोरणें गोंयांतल्या उपपीठ हांगां त्रिपुरारी पुनवे निमतान आयिल्ले कडेन पत्रकारां कडेन संवाद सादतना रामानंदाचार्य हांणी मुख्यमंत्री सावंत हांची तोखणाय केली.
महाराष्ट्रांत तशेंच गोंयांत संस्थान व्हडा प्रमाणांत जनसेवा करता. महाराष्ट्रांत शिक्षणीक उपक्रमाच्या माध्यमांतल्यान गरीब भुरग्यांची केजी ते पीएचडी मेरेनची जबाबदारी उखलतात. भलायकी सेवेच्या मळारूय व्हड काम चलता. महाराष्ट्रांत अॅम्बुलन्सी चलतात. रक्तदाना खातीर खासा मोहीम आसतात. लाखांनी लीटर रक्त आमी गरजूं मेरेन पावयतात. गरिबांक अर्थीक नदरेन घटमूट करपा खातीरूय व्हडा प्रमाणांत काम चलता अशी म्हायतीय तांणी दिली.
गोंयची 108 सेवा बरी
गोंयांत 108 अॅम्बुलन्स सेवा बरी चलता. आमी गोंयांतूय अॅम्बुलन्स सेवा सुरू करपाचो विचार केल्लो. मात, हांगाची सेवा बरी आसा. तेन्ना आमी फुडें वचूंकना अशी म्हायती रामानंदाचार्य हांणी दिली.
गोंयांत देहदाना खातीर 360 जाण इत्सुक
महाराष्ट्रांत आतां मेरेन 65 जाणांनी देहदाना खातीर अर्ज भरलां. गोंयांतूय 360 अनुयायांनी देहदानाची तयारी दाखयल्या. मात, गोंयांत कायदो वेगळो आशिल्ल्यान सगली प्रक्रिया करपा खातीर वेळ लागता, अशी म्हायतीय रामानंदाचार्य हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
