भांगरभूंय | प्रतिनिधी
भांगरभूंय । प्रतिनिधी
बेळगांवः कर्नाटक राज्यांत लागू केल्लो धर्मांतरण विरोधी कायदो रद्द करपाच्या कर्नाटकांतल्या काँग्रेस सरकाराच्या निर्णया आड राज्यांत खर आंदोलन करपाची शिटकावणी कर्नाटक भाजपान दिल्या. हे फांटभुंयेर विश्व हिंदू परिशदेन राज्यांत निशेध मोर्चे काडपाक सुरवात केल्या. फाटल्या शेनवारा तांणी बेळगांवांत चेन्नम्मा सर्कला कडेन मोर्चा काडून कर्नाटक सरकाराच्या निर्णयाचो निशेध केलो.
मोर्चा उपरांत विश्व हिंदू परिशदेच्या एका शिश्टमंडळान बेळगांवच्या उपायुक्ताच्या कार्यालयाक निवदेन भेटयलें. मोर्चांत स्वामी आनी हिंदू संघटनाचें मुखेली वांटेकार जाल्ले. भारतीय संविधानांत सगल्या धर्मांक धर्मिक एकचारान रावपाची मेकळीक आसा. मात पयशे आनी हेर हांयसा दाखोवन हिंदूचें धर्मातरण करपाक आमचो विरोध आसा. आमी हे करपाक दिवचे नात. दरेकलो हिंदू ताका विरोध करतोलो अशें ह्या निवेदनांत म्हणलां.
कर्नाटकांत काँग्रेस पक्ष फकत अल्पसंख्यांकांच्या मतानी सत्तेर येवंक ना. भोवसंख्य हिंदूनी लेगीत तांका मतां दिल्यांत. धर्मांतरण विरोधी कायदो रद्द करपाचो कर्नाटकांतल्या काँग्रेस सरकाराचो निर्णय म्हणल्यार हिंदू समाजाचो विस्वासघात आसा अशें उत्तर कर्नाटक विश्व हिंदू परिशदेचे अध्यक्ष डॉ एस आर रामनगौडर हांणी म्हणलां. अल्पसंख्यांकाक बरें दिसचें म्हणून सरकारी पाठ्य पुस्तकांतले सावरकर आनी हेर व्यक्तीं वयले धडे काडपाचो कर्नाटक सरकाराच्या निर्णयाचो हिंदू संघटनांनी निशेध केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
