धर्मस्थळ : लैंगीक अत्याचाराची चवकशी करपाक एसआयटी
भांगरभूंय | प्रतिनिधी
धर्मस्थळ, खबरां संस्था : कर्नाटकांतलें नामनेचे धर्मीक स्थळ आशिल्ल्या धर्मस्थळार १९९८ ते २०१४ मजगतीं बायलांचेर आनी नेण्ट्या चलयांचेर अत्याचार करून तांच्यो कुडी पुरिल्ल्याच्या आरोपांक लागून बरोच बोवाळ जाला. एका आदल्या नितळसाण कामगाराच्या आरोपा उपरांत राज्य सरकारान विशेश तपास पंगड स्थापन केला. हो पंगड बेगीनूच तपासाक सुरवात करतलो. धर्मस्थळ संस्थानान आपूण चवकशेक तयार आसा अशें म्हणलें.
आदल्या नितळसाण कर्मचार्यान मुखार येत सांगलें, ताचेर चेंपण हाडिल्ल्यान ह्या कुडींचो विलो लावचें पडिल्लें. ह्या प्रकरणांत बायलांचे लैंगीक अत्याचार जाल्ल्याचे पुरावेय आशिल्ल्याचें तांचें म्हणणें आसा. तांणी पुरावे, फोटो सादर करूत अधिकृत कागाळ दाखल केली.
प्रकरणाच्यो मुखेल घडामोडी:
-२२ जून वकील ओजस्वी गौडा आनी सचिन देशपांडे हांणी ह्या आदल्या नितळसाण कामगाराची भेट घेवन तांच्या कबुलीची नोंद घेतली. तो धर्मस्थळांतल्यो कांय सुवातो वळखून दाखोवपाक तयार आशिल्लो.
-२७ जून बंगळुरूच्या वकिलांच्या शिश्टमंडळान दक्षीण कन्नड जिल्ह्याच्या पुलीस अधीक्षकांक भेट दिवन तपासणेची मागणी केली.
-३ जुलयाक अधिकृत कागाळ सादर करीत मेल्ल्या कुडींचे फोटो आनी घडणुकांची म्हायती दिली.
-४ जुलयाक धर्मस्थळ पुलिसांनी भारतीय नागरी सुरक्षा संहिता (BNSS) कलम २११ (अ) खाला एफआयआर नोंद केली.
-११ जुलयाक कागाळदाराचे वकील पवन देशपांडे हांणी माध्यमां कडेन संवाद सादत पुराव्यांचे फाटभूंयेर भर दिली आनी स्वतंत्र तपासणेची मागणी केली.
-१३ जुलयाक युट्युबर समीर एमडी हांचेर एआय व्हिडीओ वरवीं फटींग म्हायती प्रसारीत केल्ल्याचो गुन्यांव दाखल.
-१४ जुलयाक बायलां आयोगाची अध्यक्ष नागलक्ष्मी चौधरी हांणी मुख्यमंत्र्यांक पत्र बरोवन SIT स्थापन करपाची मागणी केली.
-१५ जुलयाक बंगळुरूचे बायलेन तिची धूव एक एमबीबीएस विद्यार्थीनी २००३ वर्सा धर्मस्थळाक भेट देवन गायब जाल्ल्याची कागाळ दाखल केली.
-१६ जुलयाक वकिलांच्या गटान याचिका दाखल करीत गुपीत साक्षी युट्यूबरा मेरेन पाविल्ल्याचें सांगीत साक्षीदारांचे सुरक्षेचो प्रस्न हजर केलो.
ह्या गंभीर प्रकरणाक लागून धर्मस्थळचें धर्मीक आनी समाजीक वातावरण इबाडलां. न्यायालयीन देखरेखी खाला स्वतंत्र आनी पारदर्शक तपास जावचो, अशी मागणी आतां नेट धरपाक लागल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
