भांगरभूंय | प्रतिनिधी
मंगळुरू, खबरां संस्था ः कर्नाटकांतल्या धर्मस्थळ खून प्रकरणां नवे वळण मेळ्ळे. ह्या प्रकरणांतल्या कागाळदाराक राज्य सरकाराच्या खाशेल्या तपास पंगडान अटक केल्या. फाटल्या दोन दशकांत एका धर्मीक सुवातेर जायते खून, बलात्कार आनी मडीं पुरल्यात असो आरोप ह्याच मनशान केल्लो.
खबरां प्रमाण, एसआयटीचे मुखेली प्रणव मोहंती हांणी शुक्रारा रातीं उसरां मेरेन कागाळदाराची चवकशी केली. शेनवारा सकाळीं ताका अटक केली. निवेदनांत आनी कागदपत्रांत विसंगती मेळ्ळे उपरांत अटक केल्ल्याचें अधिकाऱ्यांनी सांगलें. धर्मस्थळ कथित बलात्कार आनी सामुहीक खून प्रकरणांत कागाळदार सी. एन. चिन्नय्या उर्फ चेन्ना हांणी फट म्हायती दिल्ल्याचें उक्तें जाले उपरांत एसआयटीन निमाणी ताकाच अटक केली.
कागाळदार हो देवळांतलो आदलो नितळसाण कामगार आशिल्लो. १९९५ ते २०१४ ह्या काळांत आपूण ह्या देवळांत काम करतालो आनी ताका बायलां आनी नेण्ट्यां भुरग्यां सयत जायती मडी पुरपाक लायल्लीं असो दावो तांणी केल्लो. कांय मड्यांचेर लैंगीक अत्याचाराचीं खुणां आशिल्ल्याचो आरोपूय केल्लो. हे संबंदी दंडाधिकाऱ्या मुखारय ताणें जबाब दिल्लेॉ. नितळसाण कामगाराच्या कागाळीचेर आदारुन जुलयांत धर्मस्थळ पुलीस स्टेशनांत गुन्यांव नोंद जाल्लो.
19 जुलयाक कर्नाटक सरकारान एसआयटी स्थापन करून ह्या प्रकरणाची चवकशी केली. कागाळदाराच्या जबाबाचेर आदारून पंगडान 13 सुवाती खणून काडल्यो. ह्या वेळार एक सांगाडो आनी कांय मनशाचीं हाडां मेळ्ळीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
