भांगरभूंय | प्रतिनिधी
धर्मस्थळ, खबरां संस्था: नामनेचो कन्नड युट्यूबर समीर एमडीचेर व्हिडियो वरवीं फट म्हायती पातळयिल्ल्याच्या प्रकरणांत गुन्यांव दाखल केला. एका आदल्या नितळसाण कर्मचार्यान कांय दिसां आदीं लैंगीक अत्त्याचाराच्या पिडेस्तांच्यो कुडी गुपितपणान धर्मस्थळ हांगा पुरिल्ल्याचो दावो केल्लो. ही खबर पुराय देशांत, विदेशांत गाजिल्ली.
‘धर्मस्थळांतले सिरीयल किलर कोण?’ असो माथाळो आशिल्लो हो व्हिडियो २३ मिनटां आनी ५२ सेकंदांचो आशिल्लो. अपलोड केल्ल्याक युट्युबाचेर ताका ३० लाखां वयर व्ह्यूज मेळिल्ले.
दक्षीण कन्नड पुलिसांनी दिल्ले म्हायती प्रमाण, हो व्हिडियो आर्टिफीशीयल इंटेलिजन्स (एआय) वापरून तयार केल्लो आनी हातूंत ह्या पुरपाच्या प्रकरणा विशीं बनावट गजालींचो आसपाव केल्लो. आदल्या नितळसाण कर्मचार्यान अधिकृत कागाळींत दिल्ली म्हायती आनी शुक्रारा कोर्टांत जाल्ले सुनावणे मजगतीं ताच्या नोंद केल्ल्या जबाबांत मुखार आयिल्ले म्हायती परस खूब वेगळी आसा.
समीर एमडी आड धर्मस्थळ पुलीस स्टेशनांत भारतीय न्याय संहिता कलम १९२, २४०, ३५३ (१)(ब) खाला दंगल घडोवपाच्या हेतान शिटकावणी दिवप आनी गुन्यांवा विशीं फट म्हायती दिवप, ह्या आरोपा खाला गुन्यांव दाखल केला. व्ह्यूज, लायक मेळटकच युट्यूबा कडल्यान पयशे मेळटले, म्हूण बरेच लोक मेळत तें अपलोड करपाक लागल्यात, अशें एका नागरिकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
