भांगरभूंय | प्रतिनिधी
अंतराळांत प्रदुशण वाडटलें, शास्त्रज्ञांचो अदमास
नवी दिल्ली, खबरां संस्था ः सरकारी संस्था आनी कंपनी दरवर्सा धर्तरेचे कक्षेंत जायते उपगिरे स्थापित करतात. धर्तरे भोंवतणी भोंवपी ह्या उपगिऱ्यांची संख्या कांय वर्सांनी 10 लाखां मेरेन पावतली असो शास्त्रज्ञांचो अदमास आसा. तशेंच तांकां धाडपा खातीर वापरिल्ल्या रॉकेटांचें उत्सर्जन पातळेचें प्रमाण वाडटलें. हाका लागून धर्तरेच्या वातावरणांतल्या पुर्विल्ल्या थरांक व्हड लुकसाण जातलें.
पोरण्या उपगिऱ्यांचो कोयर धर्तरेचेर पडत रावतलो. 1990 त नासान जायतीं रॉकेटां धाडले उपरांत केप कॅनाव्हरलाच्या वयर आशिल्ल्या ओझोन थरांत एक ल्हानसो बुराक तयार जालो. 2022 वर्साच्या अभ्यासा प्रमाण रॉकेट धाडपाचे प्रमाण धा पटींनी वाडलां. ताका लागून मळबाच्या कांय वाठारांनी तापमान 2 अंश सेल्सियस वाडलां. वातावरणांतलो वयलो भाग अंतराळारांतल्यान उत्सर्जित जावपी धातूंनी भरला. अंतराळ संस्था रॉकेटाच्या येसस्वीपणाक लागून जावपी धोक्यांक कमी लेखतात. पूण तांकां धाडिल्ल्यान जावपी प्रदुशण उणें करपा खातीर नेम थारावंक नाशिल्ल्याचो हुस्को शास्त्रज्ञांक आसा.
9 हजार उपगिरे उण्या कक्षेंत बसयले
धर्तरेचे सकयले कक्षेंत 9 हजारां परस चड उपगिरे स्थापन केल्यात. तातूंतले पांच हजारां परस चड स्टारलिंकाचे आसात. तो एक तरेचो नखेत्र, जो धर्तरेच्या दर एका कोनशांत इंटरनॅट सेवा स्थापन करपा खातीर स्पेसएक्स तयार करता. हें साध्य करपा खातीर हजारांनी उपगिरे धाडपाचे आसा.
अंतराळ आनी उपगिरे हांचे मदीं जावपी कामकाजाचो फरक करप खगोलशास्त्रज्ञांक कठीण जाता. हजारांनी उपगिऱ्यांक लागून बळिश्ट दुर्बिणी लेगीत अपेशी थारतात. 2020 वर्सा पयसुल्ल्या आकाशगंगेंत खूब ऊर्जावान स्फोट जाल्ल्याचो दावो केल्लो. पूण हे घडणुकेचें विश्लेशण केल्यार तो फकत एक परिक्रमा करपी उपगिरो आशिल्ल्याचें स्पश्ट जालें. ही समस्या आडावपा खातीर खगोलशास्त्रज्ञ उपगिऱ्यांचो उजवाड उणो करपाक हेर उपायांचेर संस्थे कडेन चर्चा करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
