भांगरभूंय | प्रतिनिधी
काय दिसां आदींच थ्री-आय अॅट्लस नांवाच्या एका संभाव्य आंतरतारकीय वस्तूचो सोद लागला आनी हो सोद लागत सावन धर्तरे भायर आसपी संभाव्य जीवसृश्टी विशीं नव्यान चर्चा जावपाक लागल्या. थ्री-आय अॅट्लस हो एक धुमकेतू आसा काय एक एलियनस्पेसशीप काय आनीक कितें हाची जाप रोखडीच मेळटली अशी आस्त आसा. मात युएफओ वा ‘अज्ञात उडपी वस्तू’ ह्या मुद्याचेर मात सर्वसामान्य मनीस लेगीत आतां भासाभास करपाक लागला. एकूण धर्तरेचें आकारमान, तिची सुवात आनी धर्तरेच्या आडेकुशीक लागीं वा पयस जें कितें आशिल्ल्याचें आमी सोदून काडपाक शकल्यात वा जें आमकां अजून मेरेन खबर जावंक ना त्या सगल्यांचो विचार केल्यार एकूच मुखेल प्रस्न मुखार येता तो म्हळ्यार, “ह्या अनंत ब्रह्मांडांत आमी एकलेच आसात?”
धर्तरेच्या आकाराचे तुळेन आमच्या सौरमाळेंतले हेर कांय गिरे, स्वता आमच्या सौरमाळेंतलो सूर्य हांचो आकार प्रचंड व्हड आसा. तांच्याय परस कितल्याश्याच व्हड आकाराच्यो आनी संख्येन व्हड अश्यो जायत्यो सौरमाळो आमच्या गॅलक्सींत आसात. मुखार अश्यो करोडांनी गॅलक्सी युनिव्हर्सांत आसात. आनी आतां तर अशें एकूच एक न्हय जाल्यार कितलींशींच युनिव्हर्सां म्हळ्यार मल्टिव्हर्स रचना धर्तरे भायल्या संवसारांत आसात अशेंय आमी जाणा. व्होयेजरयान जेन्ना आमच्या सौरमाळेची शीम हुपून ताचे मुखा वेल्या प्रवासाक वचपाक मुखार सरलें तेन्ना ताणें काडिल्लो ‘द पेल ब्लू डॉट’ हो एक इतिहासीक फोटो आमकां ह्या मुद्यांक समजून घेवपाक मजत करता. सौरमाळेच्या हुमऱ्या वेल्यान काडिल्ल्या फोटवांत आमच्या धर्तरेचें अस्तित्व नगण्य म्हणुये इतलें दिसलें. अशें आसत जाल्यार कल्पना करूं नजं येद्या अनंत ब्रह्मांडांत धर्तरे सारको दुसरो गिरो वा आमच्या सारके (घडये आमचे परस अदीक प्रगत लेगीत) जीव आसपाची शक्यताय आमी गृहीत धरची पडटली.
धर्तरे भायर जीवसृश्टी निर्माण जावपा खातीर जाका ‘हॅबिटबल झोन’ म्हणटात ती परिस्थिती आसची पडटा. संबंदीत गिऱ्याचें आपल्या गिऱ्या सावन आशिल्लें अंतर, उदकाची उपलब्धताय, गुरुत्वाकर्शण शक्त, वातावरण ह्या सारक्यो कांय गजाली आसपाची गरज विज्ञानीक सांगतात. घडये अशी परिस्थिती सहजपणान खूब कडेन आमकां पळोवंक मेळची ना. मात अशी परिस्थिती पुराय अनंत संवसारांत खंयच आसचीच ना अशें मानप म्हळ्यार अती-आत्मविश्वास म्हणचो पडटलो. एरीक वॉन डेनीकन ह्या लेखकान बरयिल्ल्या ‘चॅरियट्स ऑफ द गॉड्स’ पुस्तकांतल्यो देखी पळयल्यार आमच्या लक्षांत येता की धर्तरे भायल्या अज्ञात संवसारांत आमच्या सारके कोण तरी आसात हें मानपाक सुवात निश्चीत उरता.
धर्तरे भायर अशे कांय जीव आसले जरी तरी तांचो बौद्धीक स्तर कितलो आसतलो, ते आमचे परस अदीक काय आमचे परस उणे प्रगत आसतले, तांची शारिरीक-मानसीक-जैवीक रचणूक कशी आसतली अशे जायते प्रस्न ह्या निमतान लोकांक पडपाक लागल्यात. संवसारांत जायत्या सुवातींनी युएफओ पळयिल्ल्याचे दावे लोकांनी केल्यात. एरीक वॉन डेनीकन आनी ताचे सारके जायते एलीयन थिअरिस्ट पुरायपणान मानतात की धर्तरे भायल्या संवसारांत एलियन्स निश्चीत आसात आनी आदींच्या काळांत ते धर्तरेर येताले. धर्तरे भायर अशे खऱ्यांनीच जीव आसत जाल्यार तांची सांस्कृतीक, भाशीक, अर्थीक, विज्ञानीक जीण कशी आसा काय अशें लेगीत जायते रंजक प्रस्न आमच्या मनांत येवप सभावीक आसा. थ्री-आय अॅट्लस विशीं सद्याक आमकां जितलें खबर आसा ताचे वेल्यान अशें कळटा की ताचे भितर अशी कांय खाशेलपणां आसात जीं कृत्रीम स्वरुपाची आसात. देखून ही वस्तू सैमीक न्हय जाल्यार घडयिल्ली आसा अशें म्हणपाची शक्यताय उरता.
दुसरो एक म्हत्वाचो प्रस्न म्हळ्यार, जर खऱ्यांनीच धर्तरे भायर अशे जीव अस्तित्वांत आसत आनी एखाद्या दिसा ते धर्तरेर आयले जाल्यार धर्तरे वेली संस्कृताय, सर्वसामान्य जीण, तातूंतली विविधताय, भास, अर्थीक रचणूक, समाजीक चौकट, राजकी वेवस्था, सुरक्षा वेवस्था, विज्ञान-तंत्रज्ञान ह्या सगल्यांचेर कितें परिणाम जातलो? आमी पृथ्वीवासी जे तरेन अंतरिक्षांतल्या हेर संभाव्य राबितो सुवातांचो सोद घेतात तशेच तरेचो कसलो तरी सोद धर्तरे भायले संभाव्य जीव घेतात काय कितें? जर अशे कांय जीव धर्तरेर आयलेच जाल्यार पुराय धर्तरेचे वतीन तांचे कडेन उलोवणीं करची तरी कोणे? जर तांणी आमचेर हल्लो वा आक्रमण बी केलें जाल्यार आमी ताचो प्रतिकार कशे करतले? असो संभाव्य प्रतिकार करपाची आमची तितली तांक आसा? अशे कितलेशेच प्रस्न ह्या निमतान लोकांच्या मनांत उप्रासपाक लागल्यात.
केन्ना केन्ना असो प्रस्न मनांत येता की येद्या अनंत ब्रह्मांडांत असंख्य स्फोट दरेक खिणाक जायत आसतात, कितलेशेच धुमकेतू वा हेर खगोलीय वस्तू प्रचंड गतीन हांगाच्यान थंय प्रवास करीत आसतात मात इतलें सगलें आसून लेगीत ह्या प्रचंड कोलाहलांत आमची धर्तरी अजुनूय सुरक्षीत उरल्या. अशी खंयची शक्त वा योजना आसा जाका लागून धर्तरेचें रक्षण आयज मेरेन जायत आयलां? अशेय प्रस्न आमकां पडटात.
जेम्स वेब, हबल ह्या सारक्या अतीप्रगत दुर्बिणींतल्यान विज्ञानिकांनी अंतरिक्षांत घडपी, अजापीत करपी जायत्या घडणुकांचें निरिक्षण केलां. आमचे म्हान खगोलशास्त्रज्ञ दीसरात जे खर कश्ट घेतात आनी जी म्हायती एकठांय करतात ताका लागून फुडारांत आनिकूय अदीक उजवाड ह्या सगल्या गजालींचेर पडटलो हें निश्चीत. मात तो मेरेन, आमचे मुखार अशे जायते प्रस्न येत रावतले. नजीकच्या फुडारांत धर्तरेचो फुडो अशा एखाद्या खगोलीय शक्ती कडेन जालोच जाल्यार तेन्ना आमची रणनिती कितें आसतली? वा आमी तांचे कडेन कशे तरेन संवाद सादपाचो यत्न करतले? दोनूय घटकां मदीं जावपी संभाव्य देवाण घेवाण कशे तरेची आसतली? अशे जायते प्रस्न सद्या आसात. योग्य वेळ आयली की ताच्यो जापो मेळटल्योच.
डॉ. चिन्मय मधू घैसास
9823728640
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
