भांगरभूंय | प्रतिनिधी
मनशां मनशां भितर संगीत रुजिल्लें आसता. फट दिसता जाल्यार स्वताच्या काळजाचें धडधडप आयक. स्वता भितर संगीत मेळटलें. मनशाची जीण म्हणल्यार एक अलंकारी गीत जातूंत श्वास म्हणल्यारूच एके तरेचें संगीत. संगिताचें आनी मनीसकुळाचें नातें अविस्मर्णीय. संगिताच्या म्हालवजार मनीस धर्तरेर जगपाची दिका सोदता अशें म्हणल्यार अतिताय जावची ना.
धर्तरेच्या गोपांत रावन संगिताचो सोद घेवचो जाल्यार नदरेक भिडटा तो सोबीत सैम. सैम संगिताचो निर्मातो वा मुळावो सांगाती अशें म्हणूं येता. रुतू प्रमाणें धर्तरेच्या गोपांत वशिल्लो सैम संगिताचीं वेग-वेगळीं रुपां दाखयता. सैमाक संगिताचो मुळावो सांगाती कित्याक म्हणचें? हो प्रस्न उप्रासलो जाल्यार दर्यार वचून ल्हारांचो आवाज आयक. पावसांत मारपी ल्हारांचो आनी गिमांतल्या ल्हारांचो आवाज नियाळ. दर्याच्या गाजपांतूय एक संगीत आसता हें जाणवलें बगर रावना. नेमान झाडां-रुखां धोलतना व्हांवपी वार्यांत तशेंच वादळाच्या वार्यांत एके तरेचें संगीत आसता.
धर्तरेर रावन जर सैम संगिताचो सोद घेता जाल्यार पावसाळ्यांत घेवचो. जोगलांच्या चकचकांत अचकीत गडगडप म्हणल्यार संगितांतल्यान पावस येतल्याची गवाय मेळप. दोंगरा माथ्या वयल्यान ते भुंयेर पडसर पावसाचो जो आवाज आसता तो आवाज आयकत तर सैम संगिताच्या अप्रुपाची तुमीच गवाय. सैम संगीत एक आनंद दिवन वता. वझर्याच्या धबधब्यांत आनी व्हाळां-न्हंयांच्या खळखळांतूय संगीत आसता. पावसांत आपले परीन सैम संगीतमय दिसता जाल्यार शिंयाळ्यांत हे धर्तरे वयल्या सैमान निर्मिल्ल्या संगिताचें कौतूक करीन दिसता. पावस उणो जाता जाता घरा वयल्यान गळपी पांवळेचो नेट उणो जाता. ते उणे गतीचे पावळेंतूय संगीत निर्मणेची तांक आसता तशीच तांक पानगळीच्या वेळारूय आसता. अचकीत आयिल्लें वारें एका धमान जमनी वयल्यान सुक्या पाल्याक घेवन वतना जो सळसळ आयकूंक येता त्या सळसळांतूय आगळेंच संगीत आसता. सुक्या पानांचेर पांय वाटेन चलतना स्वातच्याच पावलांचो आवाज आयकूचो आनी पावला कणकणीं आशिल्ल्या संगिताचे बरे अणभवपी जावचे ते हे धर्तरेच्याच गोपांत रावन.
धर्तरेच्या गोपांत संगिताच्या सोदांत म्हणटा तेन्ना संगीत सोदल्यार पावला कणकणीं मेळटाच मेळटा हातूंत दुबाव ना. पूण ह्या संगिताच्या सोदांत तुमी केन्नाय शिंयाळ्यांत कडकडटना दातांक दांत आपटतना जो आवाज येता तातूंत केन्ना संगीत सोदपाचो यत्न केला व्हय? राती वेळार किडी रडटात अशे म्हणटात तेन्ना ते किडीच्या रडपांत संगीत सोदला व्हय? किमसां जळारी कानां कडेन येवन जो आवाज काडटा तातूंत केन्ना संगीत सोदला व्हय? पावसांत बेबे रडटात तेन्ना तांच्या रडपांत संगीत सोदला व्हय? फुलांचेर भोंवरो गुरगुरतना त्या आवाजांत सोदला व्हय संगीत? सोदात. सोदल्यार सरभोंवतणचें वातावरण कितलें संगीतमय आसा तें जाणवतलें.
ह्या संगीतमय धर्तरेर आयज संगिताची व्याख्या फक्त आनी वाद्यां पुरतीच उरल्या. पारंपारीक वाद्यां जांव वा हेर खंयचेंय आसूं, वाद्यांतल्यान संगिताची निर्मणी जाताच पूण आयज कितल्याशाच वाद्यांच्या जाळ्यांत घुस्पल्ल्यान आमी सैम संगिताच्या सुंदर देण्याचो आस्वाद घेवंक विसरल्यात व्हय?
सान्वी खांडेपारकार
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
