भांगरभूंय | प्रतिनिधी
पत्राक कारण….
मानादीक विश्वजीत राणे
भलायकीमंत्री,
नमस्कार,
तुमी भेसांत बदल केला, विचारय बदलतात अशें सगल्यांक दिसूंक लागलां. विद्यार्थ्यांच्या शिक्षणाक आदार दियात. तो मार्ग राज्यांतल्या उद्येगपतींचो, पयशेकारांचो, तुमीय ते वाटेन वचप ही बरी गजाल. तुमी अन्न सुरक्षेचे नदरेन जीं पावलां उखलल्यांत तीं नित्याचीं जावचीं, थांबचें न्हय. तातूंतल्यान रोखडेंच न्हय तरी सुदारप जातलें, ही आस्त आसा. आयज तो आनी ती घरा भायर नोकरी, वेवसायाक बिझी उरतात. तांकां अन्न घरा मेरेन पावोवपाच्यो यंत्रणा जाल्यात. अन्नाची पुरवण करपी, खाणां आनी जेवणा करपी वाडत आसात, ती बदलिल्ल्या समाजाची गरज म्हणून. ताज्ज्या अन्ना पासत पयसो मोडपाची गिरायकांची तयारी आसता. ताज्जें, भलायकेक बरें अन्न दियात, हो मंत्र वेवसायिकांक दिवचो. तंबाखू, सुपारी, सिगारेट, सोरो सोडात अशेंय तुमी भाशणांतल्यान सांगचें. तापोवन थंड केल्लें उदक पिवचें, चाळीस वर्सां उपरांत दोळ्यांक वक्ल लावचें हेंय सांगून समेस्तांक तुमी जागयात.
ग्रिन लंग्जांचो तुमचो निर्णय राज्याचो अभिमान जावचो. झाडां लायतना बोन्साय नाकात, तीं शंभर वर्सां उरतलीं ही जतनाय घेयात. एकदां राजपाटणातले भलायकी खात्याचे बिल्डिंगेक भेट दियात, पणजेतलें अर्बन हेल्थ सेंटर पळयात. तुमी जितले भोंवतले तितले समाजाचें आरोग्य सुदारतलें. मनीस ज्येश्ठते कडेन वतना विसर पडटा, कार्यक्षमता उणी जाता हो विचार केल्यार नेमावळींत बदल करुन गोवा मेडिकल काॅलेज आनी हाॅस्पिटलाक नवे वरिश्ठ अधिकारी दिवपा खातीर मार्ग काडचो.
संवसारावरी गोंयांकय हवामानातले बदल त्रास करतात. आमचो सैम, न्हंयो, दर्या म्हणल्यार आमचें धन, येणावळ. सैम सांबाळ्ळ्यार भलायकी, भूंय तिगतली. झाडां -पेडां, दोंगुल्ल्यो, शेतां, रानां, दोंगर, धर्तरी ग्रिन लंग्ज येवजणेक बळगें दिवपी. दोन वर्सां मेगा प्रकल्पांचेर बंदी घालून एक आदर्श घालून दियात. कोयर, अंडरग्रावंड पार्किंग वेवस्थापन तुमी शिकयात. बदलाचे शिल्पकार म्हणून तुमचीय नामना जावची हीच इत्सा.
– सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
