भांगरभूंय | प्रतिनिधी
अपुरबायेच्या भुरग्यांनो,
आयज तुमचे लागीं उलोवपाक म्हाका बरी संद मेळ्ळ्या. देखून तुमकां मायेमोगान उलो मारतां. कितें? तुमकां म्हजो उलो आयकूंक येता, पुणून हांव दिसना? शाण्यांनो, हें उरफाटें जालें. खरें म्हळ्यार हांव तुमकां दिसतां, पुणून म्हजो उलो तुमच्या कानार पाडना, अशें हांव येवजितां. आनी तें खरेंच आसा. तुमकां सोडाच पुणून तुमच्या जाण्टेल्यांक तो कसोच आयकूंक येना. देखूनच हांव खूब त्रासांत पडला. खूब कश्ट सोंसतां. सोंसूंक नज जावन किळांच्यो लेगीत मारतां. पुणून तुमचे जाण्टेले कानार केंस काडून म्हाका सतयत आसात. कितें म्हुण्टात भुरग्यांनो? हांव कोण? सांगतां भुरग्यांनो, हांव धर्तरी. भूंय. जिचे वेंगेंत, कुशींत तुमी आतां मेरेन जियेतात. खेळटात. नाचतात. तुमच्यो सगळ्यो क्रिया करतात. इतलेंच न्हय तर म्हजेच कुशींतलें खाण घेवन तुमी तुमचो उस्वास घेतात. तुमचे जिणेंतल्या सुखाचो, धादोसकायेचो, आनंदाचो, मनरिजवणेचे खीण अणभवतात.
भुरग्यांनो, हांव तीच धर्तरी. भूंय. कांय जाण म्हाका धरणी, जननी, धोत्री, पृथ्वी, आनी जायत्या नांवांनी उलो मारतात. पूण खरें सांगू भुरग्यांनो, म्हजे निर्मणे सावन हांव तुमची सगळ्यांची आवयूच थारल्या. पुणून, ही तुमची आतांची पिळगी तें विसरायेर घालता. देखून भुरग्यांनो, तुमचे आदरणीय शिक्षक तुमच्या शिक्षणांतल्यान तुमकां इतिहासांत व्हरतात आनी सुटकेझुजारी, शेतकार आनी जवानांचे लागणुकेंतल्यान जिणे त्यागांतल्यान तुमकां शिटकायतात. तरी लेगीत तुमच्या लक्षांत तें येना. पुणून तुमच्यांतलीं कांय लक्तुबायेचीं भुरगीं म्हजे सेवे खातीर वावुरतात तें पळोवन म्हजें काळीज भरून येता. खरें सांगता भुरग्यांनी, तुमी जर म्हजेर अशीं आडनदर करीत जाल्यार तुमचो फुडार सामको काळखी थारतलो. हे सोबीत जिणेचो आनंद घेवपाक तुमी पावचीनात. तुमी घुस्मट्टलीं. त्या घुस्मटमारांत तुमी तुमचीं सपनां पुराय करपाक पावचिंनात. खऱ्यांनीच सांगतां म्हजेर भरवंसो दवरात. म्हाका सांगात तुमची आई तुमचे लागीं फट उलयता? ना न्हय? हांवूंय तुमची आईच आसा. हांव फट उलयना. तुमकां दुबाव येता आसत जाल्यार हांव सांगतां त्यो गजाली तुमच्या घरच्या मनशांक विचारात. कितें? हांव हें अशें कित्याक उलयता काय म्हण्टात? सांगतां.. कान दिवन आयकयात.
अपुरबायेच्या भुरग्यांनो, हांव धर्तरी. रुजवणाक घालप होच म्हजो धर्म. पुणून भुरग्यांनो म्हजे कुशींत, वेंगेंत जियेवपी तुमच्या मनशांनी आपल्या सुवार्थान, अदीक सूख, धादोसकाय मेळोवपा खातीर म्हजेर धुमशेणां काडल्यांत. सुदारणेच्या नांवाखाला तुमच्या मनशांनी म्हजे वयलें पर्यावरणाचें संतुलन इबाडपाक नेट धरला. तो तुमी तुमचो पराक्रम मानूंक लागल्यांत.
भुरग्यांनो पळयात, म्हजे कुशींत जें तुमी मनशांनी तुमचे प्रमाण वाडयलां म्हळ्यार वाडीक लायलां की तातूंतल्यान जेवणा-खाणाची टंचाय, म्हारगाय, बेकारी, उपासमारी, निरक्षताय आनी गजालींचे म्हाराकेस थै थै करून म्हज्या हड्ड्यार बसून कशीं धुमशेणां काडटा तें पळयात. वाडट्या शारीकरणान खोंपीचे पट्टे वाडल्यात. उद्देगीक वसणूक, येरादारी कोयंडी, वरवीं सैमीक संपत्तीचो कसो नाश करीत आसात पळयात. तुमचो कोयर तातूंतल्यान जावपी रोग पिडा, दुयेंसां, भोंवतणची घाण, सांडपाणी हातूंतल्यान जावपी उदकाचें, हवेचें आनी आवाजाच्या प्रदुशणाचो राकेस कसो सामान्य मनशाची गची आवुळटा पळयात. म्हजे भितरल्या उद्रेकावरवीं भूंयकांप, ज्वालामुखी खतखतत आसा. कितें सांगूं तुमकां म्हजी अवस्था? म्हजे जिवाची दैना दैना जायत आसा.
अपुरबायेच्या भुरग्यांनो, निरुपायान तुमकां उलो मारला. तुमकां त्रास दिवपाक म्हाका मानवना. पुणून तुमचोच फुडार येवजून निरुपायान तुमकां उलो मारतां जमता जाल्यार म्हाका वाटावपाचो यत्न करात. तुमच्या बऱ्या फुडारा खातीर सांगतां. वाडटे उद्देग, कारखाने, झुजांतलीं स्फोटकां, अग्नीबाणांचो धूंवर, अणू चांचण्यो, विखयाळे वायू, तेला बांयांतल्यान भायर येवपी कार्बन, हांचे वरवीं म्हजो उस्वासूच अंदला. म्हजे भोंवतणचें तापमान, हवामान तुमकां कशें सतायता तें पळयात. तुमकां उस्वास घेवपाक त्रास जातात न्हय?
भुरग्यांनो, तुमी मनशांनी उदरगत घडोवन हाडचीच. म्हाकाय तुमचें बरें जाल्लें जायच. पुणून उदरगतीच्या नांवा खाला कसल्याय प्रदुशणाच्या राकेसांक वाडोवं नाकात. तें तुमकां मेकळोव उस्वास घेवंक कशेंच दिवचेंना. भुरग्यांनो, म्हजे कुशींतल्या झाडां रुखावळींची कांपणी थांबयात. शेतां भाटांची वेवस्थीत जतनाय घेयात. तीं पुरोवं नाकात. तुमचें खाणें पिणें सांबाळून दवरात. म्हजेर शेक गाजयता तो उणो करात. उदका सांठ्याची राखण करात. मिना खणींचो वापर काटकसरीन करात. भुरग्यांनो, हांवें सांगिल्ल्यो गजाली तुमी तुमच्या जाण्ट्यांक पटोवन दियात आनी तुमचे राखणे खातीर तुमच्या सांबाळा खातीर तांच्यांतल्या आपसुवार्थाक आळो घालपाचो यत्न करात. तुमी भुरगीं. तुमचीं जाण्टेलीं तुमचें आयकतलींच.
भुरग्यांनो, म्हजो फुडार आतां तुमच्या हातांत आसा. तुमकां सगळ्यांक पोसपाची तांक म्हज्यांत आसा. तुमी भिवूं नाकात. भुरग्यांनो, 22 एप्रिल तुमी म्हजे राखणेचो दीस म्हूण पाळटलीं न्हय? जाल्यार घेयात सोपूत म्हजे राखणेचो आनी लागात वावराक. जमत तुमकां?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
