भांगरभूंय | प्रतिनिधी
गोंयांत मॉन्सून हंगामा मेरेन उदकाचो हुस्को ना
पणजी: राज्यांतल्या धरणांनी अजून दोन म्हयने पावतलें इतलो उदका सांठो आशिल्ल्यान लोकांक उदकाचो उणाव भासचो ना अशें उदका स्रोत खात्याचे मुखेल अभियंते प्रमोद बदामी हांणी आयतारा ‘भांगरभूंय’ कडेन उलयतना सांगलें.
फाटल्या कांय दिसां सावन गोंयांतल्या तापमानांत सुमारा भायर वाड जाल्या. तशेंच लोकां कडल्यान उदकाचो वापरूय व्हड प्रमाणांत जायत आसा. ताका लागून मॉन्सून हंगाम सुरू जाय मेरेन धरणांचे उदक पावतलें? असो प्रस्न लोक विचारूंक लागिल्ले. पूण राज्यांतल्या सगल्याच धरणांनी अजून उण्यांत उणें दोन म्हयने पावतलो इतलो उदका सांठो आसा. ताका लागून ह्या काळातं लोकांक उदका विशीं कसलोच त्रास जावचो ना अशें बदामी हांणी सांगलें.
मजगतीं, धरणांनी उदका सांठो आसलो तरी कांय वाठारांतल्या लोकां कडल्यान गरजे परस चड उदकाचो वापर जायत आसा. तांचे कडल्यान अशे प्रकार जायत रावत जाल्यार आनी मॉन्सून हंगाम मुखार धुकल्ल्यार गोंयांत उदकाचो उणाव जाणवतलो. ताका लागून लोकांनी गरज आसा तितल्याच उदकाचाे वापर करप गरजेचें आसा. तशेंच विवीध वाठारांनी पायपलायन फुटून उदकाचें लुकसाण जाता. ताचेर भौशीक बांदकाम खात्यान (पीडब्ल्यूडी) नियंत्रण दवरप गरजेचें आशिल्ल्याचें खात्याच्या एका वरिश्ठ अधिकाऱ्यानन सांगलें.
धरणांतलो उदका सांठो
धरण वट्ट पातळी (मिटरांत) सध्याची पातळी
साळावली 41.15 34.68
अंजूणें 93.20 79.86
आमठाणें 50.03 44.41
पंचवाडी 26 20.97
चापोली 38.75 33.20
गावणें 63.50 59.50
तिळारी 113.20 88.94
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
