भांगरभूंय | प्रतिनिधी
गावणें धरण 100 टक्के भरलें
साळावली, पंचवाडी भरपाचे वाटेर
आमठाण्यां मात पोरूं परस उणो सांठो
भांगरभूंय । प्रतिनिधी
पणजी : फाटल्या कांय दिसा सावन गोंयांत पावसाचो नेट मात्सो उणो जाला. गोंयांत मॉन्सूनपूर्व आनी मॉन्सून पावसाची कांय दीस उटंगाराच्या पावसाची नोंद जाल्ली. हाका लालगून सध्या गोंयांतल्या धरणांतल्या उदकाचो सांठो समाधानकारक आसा. पोरूंचे तुळेंत अंदूं गोंयांतल्या स मदल्या पांच धरणांनी चड उदक सांठो बाकी आसा. 20 जूनाचे निमाणे मेरेन गावणे धरण 100 टक्के, साळावली 86 टक्के जाल्यार पंचवाडी धरण 70 टक्के भरलां. हेर धरणांनी लेगीत फावोसो उदकाचो सांठो आसा, अशी म्हायती उदकास्रोत खात्याचे अतिरिक्त मुख्य अभियंते ज्ञानेश्वर सालेलकार हांणी दिली.
मेळिल्ले म्हायती प्रमाण अंदीं गोंयांतल्या साळावली, अंजुणें, चापोली, पंचवाडी, गावणे धरणांनी पोरूं परस चड उदकाचो सांठो बाकी आसा. जाल्यार आमठाणे धरणांतलो उदकाचो सांठो पोरूं परस उणो आसा.
20 जून 2024 त दक्षीण गोंयची तान भागोवपी साळावली धरणांत फक्त 34.3 टक्के उदकाचो सांठो बाकी आशिल्लो. अंदूं ह्या वाठारांत पडिल्ल्या पावसाक लागून 20 जून 2025 च्या निमाणे मेरेन ह्या धरणांत 85.8 टक्के उदकाचो सांठो बाकी आशिल्लो. अंजुणें धरणांत पोरूं 14.5 टक्के उदकाचो सांठो आशिल्लो. जाल्यार अंदूं 20 जूनच्या निमाणे मेरेन थंय 17.3 टक्के उदकाचो सांठो आशिल्लो. पोरूं 20 जून मेरेन पंचवाडींत 18.55 टक्के उदकाचो सांठो बाकी आशिल्लो. मेळिल्ले म्हायती प्रमाण पोरूंचे तुळेंत अंदूं आमठाणें धरणांत उदकाचो सांठो उणो आसा. पोरूं 20 जून मेरेन आमठाण्यां 36.2 टक्के उदकाचो सांठो आशिल्लो जाल्यार अंदीं 20 जून मेरेन 21.3 टक्के उदकाचो सांठो आसा. उत्तर गोंयाक उदका पुरवण करपी तिळारी धरणाची तांक 46 हजार 217 हॅक्टर मिटर आसा. 20 जून 2025 मेरेन तातूंत 18 हजार 212 हॅक्टर मिटर (39.4 टक्के) उदकाचो सांठो शिल्लक आसा.
पावस 50 इंचां लागसार
सध्या गोंयांतलो मॉन्सून दुबळो बडला. अशें आसलें तरीय मॉन्सूनपूर्व आनी मॉन्सून पावसान उटंगाराची हाजेरी लायल्या. हाका लागून पावसाची वाटचाल 50 इंचा मेरेन पावल्या. गोंयांत 1 मे ते 21 जून ह्या काळांत सरासरी 47.60 इंच पावसाची नोंद जाल्या. हे मजगतीं, धारबांदोड्यां सरासरी 56.69 इंच, सांग्यार 54.96 इंच, काणकोणां 51.9 इंच, फोंड्यां 51.23 इंच जाल्यार मडगांवां 48.24 इंच पावसाची नोंद जाल्या.
गोंयांत पावसाचें प्रमाण उणें जाल्ल्यान चडांत चड आनी उण्यांत उण्यां तापमानांत वाड जाल्या. शेनवारा पणजे चडांत चड 32.4 जाल्यार उण्यांत उणें 27 अंश सेल्सियस तापमानाची नोंद जाली. मुरगांवां चडांत चड 31 अंश जाल्यार उण्यांत उणें तापमान 26.6 अंश सेल्सियस आसलें. गोंयांत फुडले पांच दीस चडांत चड तापमान 32 अंश जाल्यार उण्यांत उणें 25 ते 26 अंश सेल्सियस मेरेन आसपाची शक्यताय हवामान खात्यान उक्तायल्या.
हवामान खात्यान गोंयांत 22 ते 27 जून मेरेन मध्यम स्वरुपाच्या पावसाची शक्यताय उक्तायल्या. ह्या स दिसां खातीर पावसाचो यलो अलर्ट जारी केला. गोंयांत 24 वरांत सरासरी 16.6 मिलीमिटर पावसाची नोंद जाल्या. ह्या काळांत सांखळे 56.4 मिमि, वाळपय 33.2 मिमि, केप्यां 28 मिमि, धारबांदोड्यां 18.3 मिमि, काणकोणां 17.4 मिमि, पेडण्यां 15.8 मिमी, पोरणें गोंया 12.2 मिमि, म्हापश्यां 10.2 मिमि, जाल्यार सांग्यार 8.1 मिमि पावसाची नोंद जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
