भांगरभूंय | प्रतिनिधी
मडगांव: मायणा कुडटरी पुलिसांनी दुबावीत महेंदर सिंग रावत हाचे आड फाटलाग करून आक्षेपार्ह कृती करप आनी धमकी दिल्ल्या प्रकरणां गुन्यांव नोंद केल्लो. ह्या प्रकरणांत न्यायालयान दुबाविताक 25 हजार रुपयांचो वैयक्तीक बाँड आनी हेर अटींचेर अटकपूर्व जामीन मंजूर केला.
नुव्यां रॅमकॉन रेसिडन्सी हांगासरल्या वेंडी पिंटो हांणी दुबावीत महेंदर सिंग रावत हाचे आड मायणा कुडटरी पुलिशेंत कागाळ नोंद केल्ली. दुबावीत महेंदर सिंग रावत हाणें दक्षीण गोंय जिल्हो सत्र न्यायालयांत अटकपूर्व जामिना खातीर अर्ज केल्लो. न्यायाधीश शेरीन पॉल हांच्या न्यायालयांत हाचेर सुनावणी जाली.
नोव्हेंबर 2024 सावन दुबावीत महेंदर सिंग रावत हाचे कडल्यान वेगळ्या वेगळ्या सुवातांनी फाटलाग करप, विनयभंग जातलो अशा प्रकारची कृती करून दाखोवप आनी धमकी दिवपाचे प्रकार करीत आशिल्लो. दुबावितान कागाळदाराच्या घोवाकूय फोन करून धमकी दिल्ली अशेंय कागाळीत म्हणलां.
पुलिसांनी दुबावीत हो सेगीत अशे प्रकार करीत आसून ताचेर गुन्यांवूय नोंद आशिल्ल्याचें स्पश्ट केलें. जाल्यार दुबाविताच्या वकिलान न्यायालयांत सांगलें की, दुबावीत हो नौदळाचो निवृत्त कर्मचारी आसून नुव्यां एकाच वसणुकेंत रावत आशिल्ल्यान चुकीच्या गजालीचेर टिका करीत आशिल्ल्यान ही कागाळ दिल्ली. दोनूय वटानच्यो बाजू आयकून घेतले उपरांत न्यायालयान दुबावीत महेंदर सिंग रावत हाका सशर्त अटकपूर्व जामीन मंजूर केलाे. दुबाविताक 25 हजार रुपयांचो वैयक्तीक बाँड आनी तितलेच रकमेचो हमिदार, आपयले उपरांत तपास अधिकारी आनी न्यायालयांत हाजीर रावप, पुरावे नश्ट करपाचो यत्न न करप तशेंच परवानगे बगर राज्या भायर वच्चे न्हय अशा अटींचेर अटकपूर्व जामीन मंजूर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
