भांगरभूंय | प्रतिनिधी
जर उद्देगां परस ताचें (देशाचें) राजकारण चड फायदेशीर आसत, जाल्यार खंयचोच देश उदरगत करपाक शकना. ज्या देशांनी सरकारांतले लोक उद्देजकां परस गिरेस्त आसात. ते देश गरिबीचें उत्पादन
करतात.
हीं उतरां आसात पीटर ओबी हांचीं. नायजेरियाचे 25 फेब्रुवारीक जाल्ले अध्यक्षीय वेंचणुकेक ते उबे राविल्ले. मजूर पक्षा वतीन. मात तांकां तिसरो क्रमांक मेळ्ळो. बोला टिनुबू जिखले. उपराष्ट्रपती पदाचेर काशिम शेट्टीमा हांकां जैत मेळ्ळें. हालींच ओबी हांणी राजधानी आबुजांतल्या, अध्यक्षीय वेंचणूक याचिका त्रिब्युनाला मुखार याचिका घाल्या. हे वेंचणुकेचे निकाल रद्द करचे, अशी तांणी आनी कांय विरोधी पक्षांनी मागणी केल्या. जिखून आयिल्ले दोगूय फुडारी संबंदीत पदां खातीर पात्र नात, असो दावा ओबी हांणी केला. फाल्यां बुधवारा 10 मे दिसा ह्या साबार याचिकांचेर निवाडो येवपाची शक्यताय आसा. चड करून ओबी नायजेरियाचे नवे प्रधानमंत्री जावपाक शकतात. राजधानी आबुजांत भोवतेक सरकारी कार्यालयां आसात. सरकार थंयच्यान चलता. नायजेरियाच्या संविधानाच्या कलम 134- 2 बी प्रमाण फेडरल कॅपिटल टेरिटरींत 25 टक्के मतां मेळूंक नात, जाल्यार त्या उमेदवाराक अध्यक्षपदाचे वेंचणुकेंत जैतिवंत जाहीर करपाक मेळना. म्हणटकच ही वेंचणूक रद्द जावं येता, अशें कायद्याच्या जाणकारांक दिसता. हे केशीचे फांटभूंयेर पीटर ओबी जें कितें उलयल्यात, तें सगल्या संवसाराक लागू पडटा. आशियेंतल्या देशांक तर चडूच!
आशियेंतल्या बऱ्याच देशांचें राजकारण फाटल्या 2- 3 दशकांच्या काळांत खूबच सकयल्या पांवड्याचेर पावलां. भ्रश्टाचार तर तेंगशेक पावला. आमच्या भारतांत तर विचारूं नाकात. हांगां उदरगत जाल्या, पूण ताचे परस कितलेशेच पटीन भ्रश्टाचार जाला. फुडाऱ्यांनी तो पचोवन धेंकर पसून दिला. तशीं सगलींच भ्रश्टाचाराचीं प्रकरणां खरीं म्हणपाक मेळचीं नात. कारण कांय फावटी अब्जांनी रुपया खाल्ल्याचे आरोप जाल्यात आनी ताची उपरांत चवकशी पसून जावंक ना. म्हणटकच हीं प्रकरणां सत्ताधाऱ्यांक बदनाम करपाक वा तांकां सत्ते वयल्यान सकयल देंवोवपाक ओगीच उबीं केल्यांत, अशें म्हणपाक वाव आसा. विरोधकांचेरुय पुरावे नासतना आरोप जाल्यात. देश उदरगतीचे तेंगशेर व्हरपाचो आसल्यार उद्देग तरतरपाक जाय. मागीर ते व्हडले उद्देग जावं वा लघु उद्देग. घरगुती उद्देगूय अर्थीक स्थिती सुदारपाक मजत करता, हें वेगळें सांगपाक नाका. मात हांगां उद्देग आपले मुठींत दवरपाक वा तांचे मुखार आडमेळीं निर्माण करपाक कांय राजकारणी येशस्वी जाल्यात. उद्देगां परस धूर्त फुडारी सध्या चड नफ्यांत आसात. हो पयसो वेंचणुकां वेळार वा हरशी वेंचिक मतदारांचेर खर्च जाता. आतां तर मतदारांकूय ताची संवय जाल्या. वैयक्तीक काम करता तो लोकप्रतिनिधी बरो, अडचणी वेळार पावता, हात उखलून दिता (अर्थांत मतदारसंघा पुरतो) तो फुडारी देवमनीस ही भावना मतदारां मदीं रुजल्या. मतदारांचेर पयसो ओतपाचो आसा जाल्यार फुडारी गिरेस्त आसचोच पडलो. मागीर मेळटा त्या मार्गान, लिपचोरयां (पुरावे दवरिनासतना) पयसो जमोवचो पडलो. कारण ‘दिता तो पिता’ (बापूय) ही हालींच्या काळांतली राजकी संकल्पना.
गिरेस्त जावपाक कोण कितें करता, तें सगल्या राजकी आनी समाजीक मळाक खबर आसा. जायत्या फुडाऱ्यांनी साबार उद्देग उबारल्यात, गुंतवणूक केल्या…. ही गजाल खरी. पूण बेरोजगार तरणाट्यांक काम मेळचें, समाजाची सर्वांगी उदरगत जावची म्हूण वावुरपी फुडारी मेजकेच. सरकारी नोकरी दिवपी मात आसात. निरक्षर, गरीब लोक उरलेनात जाल्यार वेंचणूक आनी हेर प्रसंगार काम करपाक तरणाटे खंयचे मेळटले? ओबी म्हणटात तें खरें. जंय फुडारी सगल्यांत चड गिरेस्त, थंय गरिबीचें उत्पादन चड जाता. फाटल्या 50, 60, 75 वर्सांचो इतिहास चाळून पळोवचो. तरणाटे सपनां पळयतात, तें पुराय करपाचो हक्क तांकां दिल्यार प्रत्येक देशाचें भांगर जातलें. देश उद्देगीक, वेवसायिक, कृशी, तंत्रज्ञान मळाचेर गिरेस्त जावंक जाय. राजकी मळा वयल्या दुडवांच्या घसघश्याचो कोणाक फायदो? तातूंत फक्त फुडारी आनी तांच्या वावुरप्यांनीच न्हावपाचें!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
