भांगरभूंय | प्रतिनिधी
पुराभिलेख खात्या वतीन नव्या कायद्याचो मसुदो जारी
भांगरभूंय । प्रतिनिधी
पणजीः पुराभिलेख खात्या कडल्यान जमनीचे धनी वा कायदेशीर वारसदार आशिल्ल्या व्यक्तींकूच ते जमनीचे दस्तावेज मेळटले. फकत कांय सामक्याच गरजेच्या कारणा खातिरूच हेर लोकांक खात्याच्या संचालकाचे परवानगेन अशे दस्तावेज मेळोवपाक मेळटले. हे विशीं खात्या वतीन हालींच नव्या कायद्याचो मसुदो जारी केला. हाचेर हरकत वा सुचोवणी दिवचे खातीर 30 दिसांचो वेळ दिला.
मसुद्या प्रमाण एकादे व्यक्तीचो जल्म आनी मरणाचें प्रमाणपत्र लेगीत फकत ती व्यक्ती वा ताच्या कायदेशीर वारसदारांक मेळटलें. कागदपत्रां मेळोवचे खातीर खात्याच्या संचालकाक लेखी अर्ज करचो पडटलो. भौशीक दस्तावेज हे मायक्रे फिर्म वा डिजिटल प्रतिमांच्या स्वरुपांत उपलब्ध आसतले, जाल्यार मूळ स्वरुपांतल्यो नोंदी उपलब्ध करून दिवचे नात. फकत कांय प्रकरणांत संचालकाचे परवानगेन मूळ नोंदी उपलब्ध जातल्यो.
तशेंच खाजगी वा बिगर सरकारी संस्थांच्या ताब्यांतले दस्तावेज मेळोवपा खातीर लेगीत मसुद्यांत नवे बदल केल्यात. ते प्रमाण सरकाराक अशे खाजगी व्यक्तीं कडल्यान भेट वा हेर स्वरुपांत मेळिल्ले दस्तावेज फकत मान्यताय आशिल्ल्या संशोधकांक उपलब्ध करून दितले. जाल्यार आडवाद सोडल्यार ते संशोधकांक भौतीक तरेन ते हाताळपाक मेळचे नात, अशें मसुद्यांत स्पश्ट केलां.
कसलेय भौशीत दस्तावेज दरवर्सा नोंदणी केले बगर वा ताचो नियाळ घेतले बगर नश्ट करपाक मेळचे नात. 25 वर्सां आदले कसलेय दस्तावेज परवानगे बगर नश्ट करपाक मेळचे नात. सरकारी कार्यालयांत 25 वर्स् आशिल्ले दस्तावेज हे पुराभिलेख संचालका कडेन कायम स्वरुपी पद्दतीन जमा करचे पडटले. कार्यालयाक दस्तऐवजाच्या मूळ प्रती सयत डिजिटल प्रती लेलगीत दिवच्यो पडटल्यो.
प्रस्तावीत दर
फायल, वळेरी, पुस्तकां तपासपा खातीर 50 रुपया, बंदर कप्तान, जल्म, मरण, लग्नाचे नोंदणीचें स्कॅन आनी प्रमाणीत प्रतीच्या दरेका पाना खातीर 100 रुपया, भूंय नोंदणी आनी नोटरी डीडच्या दरेका पाना खातीर 100 रुपया, कोमुनिदाद नोंद, न्यायालयीन फायलीच्या दर पाना खातीर 100 रुपया भरचे पडटले.
अटी आनी नेम
दस्तावेजांची कॉपी काडपाक मेळटा अशें उपकरण वापरपाक मेळचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
