भांगरभूंय | प्रतिनिधी
डॉ. प्रमोद सावंत हांची शिश्टमंडळाक हमी
पणजी: राज्यांतल्या धनगर समाजाचे रानहक्क दावे, घरां कायदेशीर तशेंच गवळी धनगर हांचे विशींचे प्रस्न रोखडेच निकालांत काडटले अशी हमी मुख्यमंत्री डॉ. प्रमोद सावंत हांणी मंगळारा धनगर समाजाच्या शिश्टमंडळाक दिली.
समाज कल्याण मंत्री सुभाष फळदेसाय आनी आदले उपमुख्यमंत्री चंद्रकांत कवळेंकार हांच्या फुडारपणा खाला धनगर समाजाच्या शिश्टमंडळान मंगळारा मुख्यमंत्री डॉ. प्रमोद सावंत हांची भेट घेवन, समाजाच्यो प्रलंबीत मागण्यो पुराय करपाची मागणी केली.
धनगर समाजाचे हजारांनी रानहक्क दावे अजूनय प्रलंबीत आसात. ताचो फटको खूबशा जाणांक सोंसचो पडटा. ताका लागून ताचेर जाता तितले बेगीन सुनावण्यो घेवन प्रलंबीत दावे निकालांत काडटले. राज्याच्या विवीध वाठारांनी आशिल्लीं धनगर समाजांतल्या लोकांचीं घरां अनधिकृत आसात. अशीं घरां कायदेशीर करपाचो निर्णय सरकार रोखडेंच घेतलें अशें मुख्यमंत्री डॉ. प्रमोद सावंत हांणी म्हणलें.
मजगतीं, धनगर समाजाक एसटी दर्जो मेळोवन दिवपाचे यत्न सरकार खूबशा वर्सां सावन करीत आसा. ते खातीर समाज कल्याण खात्यान ‘आरजेआय’च्या निर्देशा प्रमाण गवळी धनगर म्हूण अधिसुचोवणीय जारी केल्या. तरी लेगीत ह्या प्रकरणाचेर अजून उपाय काडिल्लो ना. ते विशीं आपूण ‘आरजेआय’च्या संपर्कांत आसून धनगर समाजाचो हो विशय लेगीत फुडल्या कांय म्हयन्यां भितर निकालांत काडटले अशेंय मुख्यमंत्र्यांनी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
