भांगरभूंय | प्रतिनिधी
चंद्रकांत कवळेंकारः दिवचले रंगलो धनगर महोत्सव
भांगरभूंय । प्रतिनिधी
दिवचलः अनुसुचीत जमात (एसटी) दर्जो मेळोवपा खातीर धनगर समाज फाटलीं कितलीशींच वर्सां संघर्श करता. आतां ह्या संघर्शाक येस मेळपाची आस्त आनी विस्वास आसा. धनगर समाजाक हक्काचो दर्जो मेलोवपा खातीर गरजेचे ते सगळे सोपस्कार पुराय जाल्यात. बेगिनूच मुख्यमंत्री डॉ. प्रमोद सावंत हांचे वांगडा केंद्रीय म्हानिबंधका सयत गृहमंत्री अमीत शाह हांची भेट घेतले, अशें गोमंतक धनगर समाजोन्नती मंडळ- गोंयचे अध्यक्ष चंद्रकांत कवळेंकार हांणी सांगलें. लाखेरे वाठारांत धनगर महोत्सव आयोजीत केल्लो. तातूंत मुखेल सोयरे म्हूण ते उलयताले.
कला आनी संस्कृती खात्याच्या पालवान गोमंतक धनगर समाज आनी नृत्य मंडळ हांणी लाखेरेच्या श्री संत सद्गुरू बाळूमामा देवालय सभाघरांत ह्या महोत्सवाचें आयोजन केल्लें.
मानसशास्त्रज्ञ केतकी परोब हांचे हस्तुकीं दिवली पेटोवन महोत्सवाची सुरवात जाली. ह्या वेळार माचयेर आदले शेतकी मंत्री चंद्रकांत कवळेंकार, साळाचे पंच मनू शिंदे, पाळी कोठंबीची पंच आशा कस्तुरे, वन म्हावळींगेचे पंच शाहू वरक आनी हेर मानेस्त हाजीर आशिल्ले.
म्हालांतल्या पालकत्व आनी भुरग्यांची सर्वांगी उदरगत ह्या विशयाचेर खास पालकां खातीर प्रबोधनात्मक कार्यावळ आयोजीत केल्ली. भुरग्यांची जडणघडण, तांचेर कसले आनी कशे संस्कार करचे, आमच्या भुरग्यां मुखार पालकांनी कशें वागचें ह्या सारकिल्ल्या साबार विशयांचेर मार्गदर्शन केलें. पालकांनी उक्तायल्ले दुबाव लेगीत मानेस्तांनी पयस केले.
ह्या महोत्सवांत पदवी, नर्सींग, बारावी आनी धावेचे परिक्षेंत बरे गूण घेतिल्ल्या विद्यार्थ्यांचो अखील गोमंतक धनगर समाजाचे अध्यक्ष चंद्रकांत कवळेंकार हांचे हस्तुकीं भोवमान केलो. तातूंत श्वेता शिंदे, रुकमा फाले, अमीत झोरे, गंगाराम वरक, सुमित्रा लांबर, अनिता झोरे, सुप्रिया लांबर, धाकटू ताटे, सायली ताटे, प्रज्ञा यामकर, बाबुराव जानकर, खुशी ताटे, भगवान शिंगाडी, ममता यामकर, दिया झोरे आनी मुकेश झोरे हांचो भोवमान केलो.
दिवचल म्हालांतलो धनगर समाज संघटीत आसा. तातूंत कोणेच फूट घालपाचो यत्न करचो न्हय. धनगर समाज गरीब आसत, पूण लाचार न्हय. प्रामाणीक आसा. इतलेंच न्हय जाल्यार समाजा खातीर सरकाराच्यो विवीध येवजण्यो आसात, पूण कांय जाचक अटींक लागून येवजण्यांचो लाव मेळपाक लोकांक कळाव जाता, अशें गोमंतक धनगर समाजोन्नती मंडळ, दिवचल म्हालाचे अध्यक्ष आनी लाटंबार्सेचे पंच दिलीप वरक हांणी प्रास्तावीक उलोवपांत सांगलें.
गोमंतक धनगर समाजोन्नती मंडळाच्या अध्यक्षपदाचेर चवथे खेपे बिनविरोध निवड जाल्ल्यान चंद्रकांत कवळेंकार हांचो दिवचल धनगर समाजाचे संस्थापक वांगडी गणी झोरे हांचे हस्तुकीं सत्कार केलो. तशेंच बाळूमामा देवालय समिती वतीन सरचिटणीस विठोबा खरात हांचोय सत्कार केलो. दिवचल म्हालांतल्या गुणेस्त विद्यार्थ्यांचो ह्या वेळार भोवमान केलो. तशेंच समाजान उजवाडाक हाडिल्ल्या 2025 चे दिनदर्शिकेचें लेगीत मानेस्तां हस्तुकीं अनावरण जालें. करिष्मा ताटे हांणी सुत्रसंचालन केलें, जाल्यार समितीचे सचीव उमेश झिंगाडी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
