भांगरभूंय | प्रतिनिधी
भावंडांनो,
घरांतलीं जाणटीं मनशां आमकां सदांच सांगतात, “धडपडीक अंत ना. पूण येस मात आसा’’ देखून मनशान सदांच कसलेंय काम जायना, तें करपाचो यत्न करीत रावूंक जाय. मोख सादपाक वा हेत, उदिश्ट सादपाक ‘धडपड’ ही जायच. केले बगर कसलेंच काम पुर्णत्वाक पावना.
तें पुराय करपाक यत्न आनी इत्सा सामकी गरजेची. तुमकां आयज धडपडी भावांची गजाल सांगतां आयकात.
विल्बर आनी ओर्व्हिल अशे ते दोग जाण भाव. भुरगेपणांत ’हे अशेंच कित्याक?, तें तशेंच कित्याक?’ अशे प्रस्न ते आपलो दुबाव पयस करपाक आपल्या आवय बापायक विचारून सतयताले. तांच्या बापायची परतून परतून वेगळ्या वेगळ्या गांवांत बदली जाताली. ताका लागून तांच्या शिक्षणाचेर परीणाम जातालो. वेगवेगळे अभ्यासक्रम तांच्या वांट्याक येताले. देखून तांची अभ्यासांतली गोडी वताली, मात तांची बुद्ध यांत्रीक खेळण्यांची घडामोड करपाक वताली. पोरण्यो वस्तू दुरुस्त करप वा तेच तरेच्यो नव्यो वस्तू तयार करपांत ते वेळ घालयताले. विल्बर गणितांत हुशार आशिल्लो जाल्यार ओर्व्हिल शोधक बुद्धीचो आशिल्लो. ओर्व्हिलाक आयडीया’ येवजाताल्यो. जाल्यार विल्बर कागदाचेर ताचे विशीं येवजण्यो आंखतालो. दोगूय केन्ना केन्ना सवणीं करून पतंगावरवीं वयर हुबयताले. मोडक्यो सायकली दुरुस्त करून तांचेर वेगवेगळे प्रयोग करताले. हळू हळू पिराय वाडटा तशी तांणी दोगांयनी एकठांय येवन एक छापखानो तयार केलो.’दी वेस्टसायड न्यूज’ खबरांपत्र उजवाडाक हाडून ते मुद्रक प्रकाशक जाले. तातूंतल्यान पयशे जोडूंक लागले.
वेगवेगळे प्रयोग करतना ह्या दोगूय भावंडांक मळबांत सवण्यां भशेन उडपाचें येवजलें. ते खातीर तांणी सवण्याच्या पांखांचे हालचालींचो अभ्यास केलो आनी सवण्यांची नक्कल करीत मनशान उडपाचो यत्न केलो. हे धडपडींत तांकां मनशाक व्हरपी पतंग करपांत येस मेळ्ळें. फकत दोन मिण्टांच वयर उडपांत तांकां येस मेळ्ळें. तरीय चुको सुदारून उडपाचो यत्न करीत रावले. यत्न करतां करतां 1901 वर्सा अमेरिकेंतल्या किट्टी हॉकांत ते पावले आनी विल्बरान नव्या यंत्रांतल्यान 27 जुलयाक पयलें उड्डाण हवेंत केलें. पूण तें फक्त 19 सेकंदच वयर हवेंत उरलें. त्या यत्नांतल्यान देख घेयत, निराश जायनासतना तांणी आपली धडपड चालूच दवरली. 1905 वर्सा सप्टेंबरांत विमान उड्डाणाचो तांचो प्रयोग सुफळ जालो. तांणी 18 मिण्टांत इकरा मैलाचें अंतर हुंपलें. उपरांत 2 ऑक्टोबराक पावूणवरांत तांणी 24 मैलाचें अंतर हुंपलें. अशे तरेचे धडपडीन विल्बर आनी ओर्व्हिल रायट भावांनी विमान उड्डाणांत सुदारणां करीत पुराय संवसारांत इतिहास घडयलो. इतिहासा वरवीं नामनां मेळयली. ह्या संशोशना वरवीं युरोप, फ्रांस, अमेरिकेन तांकां मान सन्मान दिलो. धडपडीक अंत ना, मात येस आसा हें तांणी पुराय संवसाराक दाखोवन दिलें.
भावंडांनो, विमानाचो सोद लायले उपरांत विल्बर रायट पिरायेच्या 45 व्या वर्सा म्हणल्यार 29 मे 1912 दिसा जाल्यार अर्व्हिल रायट पिरायेच्या 76 व्या वर्सा म्हणल्यार 30 जानेवारी 1948 दिसा संवसाराक अंतरले. ह्या दोगूय धडपडी भावांची 29 मे दिसा आमी मुजरत याद काडुया आनी तांचे धडपडीची देख आपणावया. उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
