‘धक धक गर्ल’ माधुरी दीक्षित

भांगरभूंय | प्रतिनिधी

दिल, बेटा, हम आप के है कौन, दिल तो पागल है, देवदास ह्या सिनेमांतल्या भुमिके खातीर उत्कृश्ट अभिनेत्री पुरस्कार फावो जालो.

एका काळार लाखांनी दिलांची धडकन आशिल्ली हिंदी सिनेमाची सदाबहार अभिनेत्री ‘धक धक गर्ल’ माधुरी दीक्षित हिचो आयज 58 वो वाडदीस. हिंदी फिल्म इंडस्ट्री खातीर माधुरी हें एक गोड सपन. आयच्या 40 ते 60 वर्सां पिरायेच्या गटांतल्या लोकांची माधुरी ही आवडटली अभिनेत्री आशिल्ली. माधुरीचो सिनेमा ‘फर्स्ट डे, फर्स्ट शो’ पळोवपी प्रेक्षकांचो आंकडो त्या वेळार लाखांनी आशिल्लो.
15 मे 1967 दिसा जल्मल्ली माधुरी ही सोबीतकाय, नाच, अभिनयाची मूर्ती. पिरायेच्या 17 व्या वर्सा हिंदी फिल्म मळार प्रवेश केल्ल्या माधुरीक पदार्पणाक मान्यताय मेळ्ळी ना, कारण तिचो पयलो चित्रपट ‘अबोध’ फ्लाॅप थारलो. उपरांत कांय बी ग्रेड फिल्मांनीय तिणें अभिनय केलो. ‘उत्तर- दक्षिण हो तिचो पयलो वेवसायीक चित्रपट. पूण तातूंतय तिची भुमिका कोणाकूच दिसली ना. मात ‘तेजाब’ ह्या सिनेमान तिचें नशीब बदल्लें. तातूंतलें ‘एक दो तीन’ हें गीत खूब हिट जालें. ह्या गीता वयल्या तिच्या नाचान तरणाट्यांक पिशें केल्ले. तिणें केल्ली मोहिनीची भुमिका प्रेक्षक अजून विसरूंक नात. माधुरीन आपल्या अभिनय आनी नाचान हो सिनेमा यशस्वी केलो. उपरांत निर्माते आनी दिग्दर्शक तिच्या घरा लायन लावपाक लागले. सलग आठ फिल्मांनी फ्लॉप जाल्ली माधुरी तेजाब फिल्माच्या यशा उपरांत यशस्वी अभिनेत्रीं मदीं पावली. ह्या सिनेमांतलो तिचो नायक अनिल कपूर. प्रेक्षकांक ही जोडी खूब आवडली. उपरांत हे जोडयेन परिंदा, रामलखन, किशन कन्हैया, जीवन एक संघर्ष, जमाई राजा, खेल, बेटा, जिंदागी एक जुआ, राजकुमार, पुकार अशे जायते हिट सिनेमा दिले.
माधुरीची जोडी फकत अनिल कपूरा कडेन न्हय, तर जॅकी श्रॉफ, मिथुन चक्रवर्ती, ऋषी कपूर, संजय दत्त, शाहरुख खान, आमिर खान, सलमान खान ह्या कलाकारां कडेनय जाली. तिणें अभिनय केल्ले चडशे सगळे चित्रपट यशस्वी जाले. तेजाब, दिल, साजन, परिंदा, राम लखन, खलनायक, हम आप के है कौन, प्रेमग्रंथ, बडे मियाँ छोटे मियाँ, बेटा, कोयला, दिल तो पागल है, देवदास बॉक्स ऑफिसाचेर यशस्वी जाले. कांय सुपरहिट जाले. ‘हम आपके है कौन’ ह्या चित्रपटांतल्यान इतिहास निर्माण जालो. ह्या सिनेमांतली तिची अभिनय आनी सोबीतकाय जायत्या जाणांक स्पर्श करून गेली. तिची भुमिका पळयल्या उपरांत चित्रकार एम.एफ. हुसेनाक तिचेर इतलो मोग जालो की ताणें तिचे शेंकड्यांनी चित्रां तयार केलीं, हाका लागून लोक तिका माधुरी फिदा हुसेन म्हणपाक लागले. तांणी तिचेर गजगामिनी नांवाचो चित्रपटूय तयार केलो. माधुरीच्या नांवान एक गीतय प्रदर्शीत जालें (माधुरी मिली मुझे रास्ते मे…) आनी इतलेंच न्हय, तिच्या नांवान एक चित्रपटय आयलो (मैं माधुरी दीक्षित बनना चाहतीं हुँ).
तिका पांच फावटीं प्रतिश्ठीत फिल्मफेयर पुरस्कार फावो जाला. दिल, बेटा, हम आप के है कौन, दिल तो पागल है, देवदास ह्या सिनेमांतल्या भुमिके खातीर उत्कृश्ट अभिनेत्री पुरस्कार फावो जालो. तिका 2001 त सिनेमाक दिल्ल्या योगदाना खातीर राश्ट्रीय पुरस्कारुय फावो जाला. भारत सरकारान पद्मश्री पुरस्कार दिवन तिचो भोवमान केला. माधुरीन 70 परस चड चित्रपटांनी अभिनय केला. लोकप्रियतेचे तेंगशेर आसतना अमेरिकेंतले वेवसायीक श्रीराम नेने हांचे कडेन तिचें लग्न जालें. ताचे पयलीं ती संजय दत्ता कडेन लग्न जातली, अशें नेमाळ्यांनी उजवाडाक येतालें. पूण हें सगलें फटीचें हें तिणें सिद्ध केलें. लग्ना उपरांत ती अमेरिकेक गेली.
कांय वर्सां थंय रावून ती परतून मुंबय आयली. मुंबय परत येतकच तिणें गुलाब गॅंग आनी देढ इश्किया ह्या चित्रपटांनी काम केलें. उपरांत दूरचित्रवाणीचेर झलक दिखला जा, डान्स इंडिया डान्स ह्या नाचाचेर आदारिल्ल्या रियलिटी शोंतय जज म्हणून काम केलें. इतल्या वर्सां उपरांत लेगीत माधुरीची जादू उरल्या. फाटल्या दोन दशकांत हिंदी फिल्म इंडस्ट्रींत शेंकड्यांनी अभिनेत्री आयल्यात आनी गेल्यांत, पूण हिंदी फिल्म इंडस्ट्रींत तिची बरोबरी करप सोडून तिच्या लागीं लेगीत येवंक शकता अशी एकूय अभिनेत्री ना. हाचे वयल्यानूच माधुरीचें श्रेश्ठत्व सिद्ध जाता. सोबीतकाय, नाच आनी अभिनयाचो त्रिवेणी संगम आशिल्ल्या अभिनेत्री माधुरी दीक्षित हिका वाडदिसाचीं परबीं……!

श्याम ठाणेदार
9922546295