भांगरभूंय | प्रतिनिधी
हिंदी सिने मळार सदाहाबार अभिनेत्री, लाखांनी लोकांची धडकन, धक धक गर्ल धामुरी दीक्षित हे अभिनेत्रीन काल बुधवारा 57 वाे वाडदीस मनयलो. माधुरी दीक्षित म्हणल्यार हिंदी सिने मळाक पडिल्लें एक मधूर सपन. आयज जे 40 ते 60 ह्या पिराये गटांत आसात तांचे खातीर माधुरी म्हणल्यार सगलें कितें आशिल्लें. माधुरीक पळयतकच हे लोक ल्हानाचे व्हड जाले. माधुरीचो सिनेमा फर्स्ट डे फश्ट शो पळोवप्यांची संख्या त्या काळांत लाखांनी घरांत आशिल्ली. 15 मे 1967 दिसा जल्मल्ली माधुरी म्हणल्यार सुंदरताय, नृत्य आनी अभिनय हांचो त्रिवेणी संगम. पिरायेच्या 17 व्या वर्सा हिंदी सिने मळार प्रवेश करपी माधुरीचो पयलो सिनेमा ‘अबोध’ फ्लोप जालो. ताका लागून तिच्या पदापर्णाची दखल कोणेच घेतली ना. उपरांत तिणे कांय बी ग्रेड सिनेमांतूय भुमिका केल्यो. उतर दक्षीण हो तिचो तसो पयलो वेवसायीक सिनेमा. पूण हातूंत लेगीत तिचे भुमिकेची काेणेंच दखल घेतली ना. पूण ‘तेजाब’ सिनेमा आयलो आनी तिचें नशिबूच बदल्लें. तेजाब सिनेमांतलें ‘एक दोन तीन…’ हें पद सुपर हीट थारलें. ह्या पदांत तिचो नाच तरणाट्यांनी माथ्यार घेतलो. ह्या सिनेमांत तिणें साकारिल्ली मोहिनी नांवाची भुमिका प्रक्षेक आयजूय विसरूंक शकले नात. माधुरीन हो सिनेमा आपल्या अभिनय आनी नाचान येसस्वी करून दाखयलो.
ह्या सिनेमा उपरांत निर्माते दिग्दर्शक तिच्या घरा रांगो लावंक लागले. सेगीत आठ सिनेमा फ्लॉप जाल्ल्या माधुरीची तेजाबाच्या येसा उपरांत येसस्वी अभिनेत्री म्हूण गणना जावंक लागली. ह्या चित्रपटांत तिचो नायक अनील कपूर आशिल्लो. ही जोडी प्रेक्षकांक खूब आवडली. मुखार हे जोडयेन परींदा रामलखन, किशन कन्हैया, जीवन एक संघर्ष, जमाई राजा, खेल, बेटा, जिंदगी एक जुआ, राजकुमार, पुकार अशे खूबशे हीट सिनेमा दिले. माधुरीची जोडी फक्त अनील कपूर हाचे कडेन जमली अशें ना जाल्यार जॅकी श्रॉफ, मिथून चक्रवर्ती, ऋषी कपूर, संजय दत्त, शाहरुख खान, अमीर खान, सलमान खान अशा सगल्यांच अभिनेत्यां कडेन जमली. तिणें अभिनय केल्ले सुमार सगलेच सिनेमा येसस्वी जाले. तेजाब, दिल, साजन, परींदा, राम लखन, खलनायक, हम आप के है कौन, प्रेमग्रंथ, मृत्युदंड, बडे मिया छोटे मिया, बेटा, कोयला, दिल तो पागल है, देवदास हे सिनमा तिकेट बॉक्सार सुमारा भायर येसस्वी थारले. तिचे खूबशे सिनेमा हीट जाल्यार कांय सिनेमा सुपरहीटजाले.
तिच्या ‘हम आपके है कौन’ ह्या सिनेमान इतिहास घडयलो. ह्या सिनेमांतल्या तिच्या अभिनायक आनी सौंदर्यान खूबशा जाणांचेर मोनेळ घालो. ह्या सिनेमांतली तिची भुमिका पळोवन नामनेचे चित्रकार एम एफ हुसेन हे तिचेर इतले फिदा जाले की तांणी तिचे शेंकड्यांनी पोट्रोट तयार केले. हाचे वेल्यान तांकां लोक माधुरी फिदा हुसेन अशें म्हणूंक लागले. तांणी तिचेर गजगामीनी नांवाचो सिनेमाय तयार केलो. माधुरीच्या नांवाचें पदूय आयलें. (माधुरी मिली मुझे रस्ते मे…) इतलेंच न्हय तर तिच्या नांवार सिनेमा लेगीत आयले. (मै माधुरी दीक्षित बनना चाहती हु).
तिका खूबशे पुरस्कार मेळ्ळे. प्रतिश्ठेचो फिल्मफेअर पुरस्कार तिणें सुमार पांच फावटी मेळयलो. दिल, बेटा, हम आप के है कौन, दिल तो पागल है, देवदास ह्या सिनेमाच्या तिचे भुमिके खातीर तिका फिल्मफेअरान सर्वोत्कृश्ट अभिनेत्रीचो पुरस्कार दिला. तिणें राष्ट्रीय पुरस्कारूय मेळयला. भारत सरकारान तिका पद्मश्री हो मानाचो पुरस्कार दिवन भोवमानीत केला. माधुरीन सुमार 70 परस चड सिनेमांनी भुमिका केल्यात. हातूंतली तिची भुमिका आयजूय लोकप्रीय आसा. लोकप्रियेतेचे तेंगशेर आसतनाच तिणें श्रीराम नेणे ह्या अमेरिकेंत रावपी उद्देगपती कडेन लग्न केलें. लग्ना आदीं तिचें संजय दत्त हाचे कडेन अफेर आशिल्लें. तीं दोगांय जाणां लग्न करतलीं अशें फिल्मी म्हयनाळ्यांत छापून येतालें. तिणें मात ह्यो सगल्यो वावड्यो आशिल्ल्याचें सिद्ध केलें आनी लग्ना उपरांत सरळ अमेरिकेक
गेली.
अमेरिकेंत कांय वर्सां रावले उपरांत परतून मुंबयंत आयली. मुंबयंत आयले उपरांत तिणें गुलाब गँग आनी देढ इष्किया ह्या सिनामा वरवीं पुनरागमन केलें. उपरांत तिणें टेलिव्हिजनाचेर झलक दीखला जा, डान्स इंडिया डान्स ह्या सारक्या नाचाचेर आदारीत रिएलिटी शाची जज म्हणून लेगीत काम केलां. आयज इतल्या वर्सा उपरलांत माधुरीची जादू कायम आसा. फाटल्या दोन दसकांत शेंकड्यांनी अभिनेत्री हिंदी सिने मळार आयल्यो आनी गेल्यो. पूण तिची बरोबरी करपी जाल्यार सोडाच. पूण तिचे लागीं पावतली अशी एकूय अभिनेत्री हिंदी सिने मळार मेळिल्ली ना. हातूंतल्यानच माधुरीचें श्रेश्ठत्व सिद्ध जाता. सौंदर्य, नाच आनी अभिनय हांचो त्रिवेणी संगम आशिल्ली सदाबहार अभिनेत्री माधुरी दीक्षित हिका वाडदिसाचीं परबीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
