भांगरभूंय | प्रतिनिधी
काळखांतल्यान उजवाडाचो सोदः मार्क लिओनार्ड विंटर
भांगरभूंय । खबरां मेज
पणजीः इफ्फींत सोमारा सिनेमॅटीक अणभव दिवपी ‘द रुस्टर’ हो ऑस्ट्रेलियन चित्रपट दाखयलो. दिग्दर्शक आनी लेखक मार्क लिओनार्ज विंटर, मुखेल अभिनेतो ह्युगो विव्हिंग आनी निर्मातो गेराल्डीन हॅकवील तशेंच महवीन शाहराकी हांचे सयत चित्रपटाच्या क्रिएटिव्ह पंगडान चित्रपट तयार करतना आयिल्ले आपले अणभव सांगले.
मार्क लियोनार्ड विंटर हांणी सांगलें, हो चित्रपट म्हणल्यार काळखांतल्यान घेतिल्लो उजवाडाचो सोद. हो एक सामकोच वैयक्तीक प्रकल्प आशिल्लो. आपले गॅरेजींत तो तयार केला. भारतांतल्या प्रतिश्ठीत महोत्सवांत हो चित्रपट दाखोवप म्हणल्यार आमचो खरो भोवमान.
‘द रुस्टर’ चित्रपटांत डॅन ह्या तरण्या पुलीस अधिकाऱ्याची कथा सांगल्या. डॅन ताचो लागींचो इश्ट स्टिव्हच्या मरणा उपरांत रानांत वता. रानांत ताका एक संन्यासी मेळटा. ताचे कडेन स्टीव्हच्या गूट मरणाच्यो जापो घडये मेळूं येतात, अशें डॅनाक दिसता. हो चित्रपट दुख्ख, सुमारा भायर लुकसाण आनी अर्थपूर्ण संघर्श ह्या संकल्पनां वरवीं फुडें वता. ह्या चित्रपटा निमतान घेतिल्ले पत्रकार परिशदेंत हाजीर आशिल्ल्या सगळ्यांनीच चित्रपटा विशीं तशेंच आपल्या अणभवा विशीं मतां मांडलीं. ऑस्ट्रेलियन चित्रपट मळाचो फुडार, स्वतंत्र चित्रपट निर्मात्यांचीं आव्हानां आनी चित्रपट वितरणांतली डिजिटल प्लॅटपॉर्माची वाडटी भुमिका हाचेर चर्चा करून पत्रकार परिशद सोंपयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
