भांगरभूंय | प्रतिनिधी
बोमन इराणीचें दिग्दर्शन मळार पावल
भांगरभूंय । जॉन आगियार
पणजीः अभिनेतो बोमन इराणी हाचो दिग्दर्शनांत पदार्पण करपी ‘द मेहता बॉयज’ चित्रपटाचो 55व्या आंतरराष्ट्रीय चित्रपट महोत्सवांत प्रीमियर जालो.
बोमन इरानी आनी अविनाश तिवारी हांणी अभिनय केल्लो ‘द मेहता बॉयज’ हो चित्रपट एकामेकां कडेन वादग्रस्त आशिल्ल्या बापूय आनी पुताचेर आदारिल्लो आसून तांकां 48 वरां एकठांय रावपाची सक्ती जाता. हो चित्रपट तांच्या बोवाळी प्रवासाक पाळो दिता आनी बापूय-पुताच्या संबंदांत चड करून आशिल्ल्या गुंतागुंतांचें बारीकसाणीन संशोधन करता. सुंदर काणी आनी तितलेंच बरें दिग्दर्शन. ह्या चित्रपटान लोकांची काळजां जिखलीं.
मुन्ना भाई फ्रॅंचायजी, 3 इडियट्स, खोसला का घोसला ह्या चित्रपटांक लागून नामना मेळिल्ल्या इराणीन ह्या प्राइम व्हिडियोंत ओरिजिनल फिल्माचो लेखक आनी निर्मातो म्हणूनय काम केलां. 2014 इस्वेंत ऑस्कर विजेतो जाल्ल्या ‘बर्डमन’ ह्या सिनेमा खातीर चड नामना मेळिल्ल्या ऑस्कर जैतवंत लेखक अलेक्झांडर डिनेलारीस जुनियराच्या सहकार्यान ताणें हो प्रकल्प बरयला.
20 सप्टेंबराक जाल्ल्या पंदराव्या शिकागो दक्षीण आशियायी चित्रपट महोत्सवांत ह्या सिनेमाचो संवसारीक प्रीमियर जाल्लो.
इफ्फीत हो चित्रपट सोंपल्या उपरांत इराणी वांगडा हेर कलाकारांनी प्रेक्षकां कडेन संवाद सादलो. ह्या वेळार बोमन इराणीन आपल्या चित्रपटाची म्हायती दिली. हेर कलाकार: अविनाश तिवारी, श्रेया चौधरी, आनी पुजा सरूप. दिग्दर्शक: बोमन इरानी, जांणी अॅलेक्स डिनेलारिस जुनियर हांचे वांगडा पटकथाय बरयली. प्रॉडक्शन: इराणी मुवीटोन एलएलपी आनी चॉकबोर्ड एंटरटेनमेंट एलएलपी हांणी तयार केलां. अमेझॉन प्रायम व्हिडियोचेर मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
