भांगरभूंय | प्रतिनिधी
नवी दिल्ली, खबरां संस्था ः भारताच्या इतिहासा संबंदीं एक खाशेली गजाल मुखार आयल्या. खाशेलो आनी दुर्मीळ असो ‘द गोलकोंडा ब्लू डायमंड’ निळो हिरो (The Golconda Blue Diamond) पयलेच खेपे पावणे खातीर सादर करतले. 14 मे दिसा स्वित्झर्लंडांतल्या जिनेव्हांत क्रिस्टीजन कंपनीन आयोजीत केल्ले ‘मॅग्निफिसेंट ज्वेल्स’ पावणेत ह्या इतिहासीक हिऱ्याचो आस्पाव जातलो.
‘गोलकोंडा ब्लू’ नांवाचो हो निळो हिरो भारतांतल्या तेलंगणाच्या गोलकोंडा खणींत मेळिल्लो. तो खूब पोरणो, सोबीत आसा. ताचें वजन 23.24 कॅरेट आसून ताचें मोल सुमार 300 ते 430 कोटी रुपया आसपाची शक्यताय आसा.
हो हिरो एका वेळार इंदूर आनी बडोदाच्या राजघराण्यांचो अभिमान आशिल्लो. तेन्ना तो तांच्या महाराजां कडेन आशिल्लो. 1920-30 च्या दशकांत इंदूरचो महाराज यशवंतराव होळकर हांणी हो हिरो एका कड्यांत बसयल्लो. मागीर त्या हिऱ्यापसून एक हार तयार केलो आनी तो हार इतलो सोबीत आशिल्लो की एका फ्रेंच चित्रकारान महाराणीचें चित्र काडिल्ले आनी तातूंत तो हार दाखयल्लो.
1947 वर्सा भारत स्वतंत्र जावचे पयलीं न्यूयॉर्कचो नामनेचो जौहरी हॅरी विंस्टन हाणें हो हिरो विकत घेतलो. उपरांत ताणें तें बडोदाच्या महाराजाक विकलो. देखून तो परत एका भारतीय राजघराण्याचो भाग जालो. आतां हो हिरो 14 मेक स्वित्झर्लंडांतल्या जिनेव्हा शारांत जावपी व्हड पावणेत विक्री खातीर दवरतले. ही पावणी क्रिस्टी नांवाची कंपनी करतली. ‘कोहिनूर’ सारके हेर नामनेचे हिरेय ताणीं विकल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
