भांगरभूंय | प्रतिनिधी
भांगरभूंय । प्रतिनिधी
पणजीः इंडिया आघाडेचो घटक आसूनय काँग्रेसाची वाट पळयनासता आम आदमी पक्षान (आप) दक्षीण गोंयांतल्यान आमदार व्हेंझी व्हिएगश हाक उमेदावरी जाहीर केली आसतना आप आनी काँग्रेसच्या प्रदेश अध्यक्षांनी दिल्लींत वचून इंडिया आघाडेच्या वरिश्ठ फुडाऱ्यां कडेन चर्चा केली. फुडल्या दोन दिसांत दक्षीण गोंयांतल्या उमेदवारीचेर तोडगो काडटले अशें आपाचे राज्य निमंत्रक अमित पालेकार हाणे शुक्राराक पत्रकारांक सांगलें.
लोकसभा वेंचणुकेंत इंडिया आघाडे वांगडा रावपाचो निर्णय आमचे राष्ट्रीय निमंत्रक आनी दिल्लीचे मुख्यमंत्री अरविंद केजरीवाल हाणे घेतला. राज्यांतल्या दोनूय लोकसभा मतदारसंघांतल्या उमेदवारी विशीं वरिश्ठ फुडाऱ्यां कडेन दिल्लींत चर्चा सुरू आसा. उमेदवार जाहीर करपाक काँग्रेस पक्षा कडल्यान कळाव जाता देखून आपान उमेदवार म्हणून व्हेंझी व्हिएगश्याच्या नांवाची घोशणा केल्या अशें पालेकारान स्पश्ट केलें.
इंडिया आघाडेचे उमेदवार निश्चीत करपी दिल्लींतल्या फुडाऱ्यां कडेन हावें चर्चा केल्या. म्हजी भूमिका हांवे तांच्या सामकार मांडल्या. दक्षीण गोंयांत कोणाक उमेदवारी दिवपाची हाचो निर्णय वरिश्ठ फुडारी घेतले. दोन दिसांत कितें तें थारतले अशें सांगून गोंयांतलो दोनूय सुवातो जिखपा खातीर आमी सामूहीक यत्न करतले अशी म्हायती पालेकारान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
