भांगरभूंय | प्रतिनिधी
179 जाणांक मरणः लॅण्डिंगा वेळार रोदां उक्तीं जालीं नात
खबरां संस्था
सोलः बँकॉक सावन येवपी जेजू अॅराचें विमान आयतारा दक्षीण कोरियांतल्या मुआन विमानतळाचेर कोसळ्ळें. खबरां एजन्सीन दिल्ले म्हायती प्रमाण विमानांत 175 प्रवासी आनी 6 क्रू मेंबरां सयत 181 लोक आशिल्ले. तातूंतल्या 179 जाणांक मरण आयलें. दोगांक जिवीत भायर काडल्यात, अशी म्हायती बचाव पंगडान दिल्या. मरण आयिल्ल्यां मदीं 82 दादले आनी 84 बायलांचो आस्पाव आसा. 11 कुडींची वळख अजून पटूंक ना.
हो अपघात भारतीय वेळा प्रमाण फांतोडेर 5.37 वरांचेर (थळाव्या वेळा प्रमाण सकाळीं 9.07) जालो. हें विमान मुआन आंतरराष्ट्रीय विमानतळाचेर देंवपाचें आशिल्लें. त्याच वेळार लँण्डींग गियरांत बिघाड जालो, ताका लागून ताचीं रोदां उक्तीं जावंक नात. रोदां उक्तीं जावंक नाशिल्ल्यान विमानान इमर्जन्सी बेली लॅण्डींग केलें. तातूंत विमान थेट धांवपट्टीचेर आपट्टा. ह्या वेळार विमान धांवपट्टीचेर निसरलें आनी विमानतळाचे शीम वण्टीक आपटलें. विमान आपट्टाच व्हड स्फोट जालो आनी ताचें रुपांतर उज्याच्या गुळ्यांत जालें. अपघाता उपरांत विमानतळा वयली येरादारी बंद केली. सगळीं थळावीं आनी आंतरराष्ट्रीय उड्डाणां रद्द केलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
