भांगरभूंय | प्रतिनिधी
पणजी : गोंयच्या हडफडेंच्या नायट क्लबाक लागिल्ले उज्याचे घडणुके उपरांत राज्यांत सुरू आशिल्ल्या बेकायदेशीर वेवसायाक फटको बसला. बेकायदेशीर वेवसायांचेर कारवाय करप सुरू केली. काब द राम, खोला, काणकोणा शॅकाचो परवानो घेवन सुरू आशिल्लें ‘द केप गोवा’ रेस्टॉरंटाक कार्यकारी दंडाधिकारी तशेंच जोड अंमलबजावणी समितीची अध्यक्ष माया पेडणेंकार हांचे अध्यक्षतेखाला समितीन कारवाय करीत सील केलें. जोड समितीन केल्ले तपासणेंत हे सुवातेर खुबश्यो अटी पाळिनाशिल्ल्याचें दिसले उपरांत ही कारवाय केली.
‘द केप गोवा’ रेस्टॉरंट’चे ल्हानशे सुवातेर २४ जाण गर्दी करून बशिल्ले. धनी बांधकामा विशीं स्ट्रक्चरल प्लॅन आनी स्ट्रक्चरल स्टॅबिलिटी रिपोर्ट सादर करपाक शकले ना. किचनांतली वेवस्था सुरक्षीत नाशिल्ली आनी भायर सरपाक गरजेची सुवात नाशिल्ली. इल्लेशे सुवातेर २९ वेवसायीक सिलींडर धोको निर्माण करपी स्थितींत दवरिल्ले. एलपीजी गॅस गळती डिटेक्टर बसोवंक नाशिल्लो.
विजेचो एमसीबी बोर्ड उक्तो आनी असुरक्षीत आशिल्लो. रेस्टॉरंटांत उजो पालोवपी उपकरणां नाशिल्लीं. लायटीची वायरिंग धोको निर्माण करपी स्थितींत आशिल्लीं. पर्यटन खात्या कडल्यान खासगी शॅक चालोवपाचो परवानो घेवन रेस्टॉरंट चलयताले. तातूंत बार कावंटर, रांदचीकूड, पँट्री, बेकरी, सुमार १२० कर्मचारी, स्टाफ मेस, १२० जाण बसपाची तांक आशिल्लीं ४० कदेलां, टेबल अश्या जायतया गजालींचो आसपाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
