भांगरभूंय | प्रतिनिधी
उपजिल्लोधिकार्यांचे जीसीझेडएमए, प्रदूशण, पर्यटन खात्याक पत्र
मडगांव : राज्य सरकारा कडल्यान स्थापन जोड अंमलबाजवणी आनी देखरेख पंगडाच्या निर्देशा उपरांत विवीध नेम मोडिल्ल्या प्रकरणांत काणकोणचो द केप गोवा हो रिसॉर्ट सील केलो. दक्षीण गोंय उपजिल्लोधिकार्यांनी जीसीझेडएमए, प्रदूशण नियंत्रण मंडळ आनी पर्यटन संचालनालयाक पत्र धाडून ह्या रेस्टॉरंटाची बेगोबेग पळोवणी करुन कारवाय करपाची मागणी केली.
काणकोणच्या काब द राम दयारदेगे लागसारचे दोंगर कापून उबारिल्ल्या द केप गोवा ह्या रिसॉर्टचेर जोड अंमलबजावणी आनी देखरेख समितीच्या अहवालांत खुबश्या तरेचे नेम मोडिल्ल्याचें दिसून आयलें. हातूंत सीआरझेड क्षेत्रात दोंगर कापप, स्ट्रक्चरल स्टेबिलिटी प्रमाणपत्र नासप, ऑक्युपन्सी प्रमाणपत्र, पंचायतीची परवानगी हातूंतलें कितेंच ना. २०२२ त अस्थायी स्वरुपाचो शॅक उभारणी खातीर पर्यटन खात्यान दिल्ल्या परवान्याच्या आधारार हो रिसॉर्ट उबारलो. हो रिसॉर्ट सील केले उपरांत आतां दक्षीण गोवा उपजिल्हाधिकारी (महसूल) रोहन लोलयेंकार हांणी अंमलबजावणी समितीच्या अहवाला सयत रिसॉर्ट बंद केला. सीआरझेड आनी पर्यावरणीय कायचो मोडिल्ल्यान हें बेकायदेशीर बांदकाम मोडून घालप, जागो पयलीं भशेन करप आनी पर्यावरणाचे लुकसाणेची भरपाये विशीं अहवालांत नमूद आसा. हे प्रमाण गोवा कोस्टल झोन मॅनेजमेंट ऑथोरिटीच्या वांगडी सचिवांक पत्र धाडलां. तशेंच गोंय प्रदूषण नियंत्रण मंडळाच्या वांगडी सचिवांक पत्र धाडून समितीन दिल्ल्या अहवाला प्रमाण पर्यावरण कायद्याच्या उल्लंघना खातीर कारवाय करपाक सांगलें. तशेंच पर्यटन खात्याच्या संचालकांक पत्र धाडून पर्यटन खात्याच्या जागेंत ह्या आस्थापनांची पळोवणी करची आनी बेकायदो बांधकामांचेर कायद्या प्रमाण कारवाय करची, अशेंय सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
