भांगरभूंय | प्रतिनिधी
खबरां संस्था
नवी दिल्लीः दक्षीण आफ्रिकेचो स्पीनर केशव महाराजान अयोध्येंत राम मूर्ती प्रतिश्ठापने खातीर भारतीयांत परबीं भेटयल्यांत. ताणे आयतारा सोशल मीडियाचेर एक व्हिडिओ पोस्ट करून “तुमकां सगल्यांक नमस्ते, दक्षीण आफ्रिकेंत रावपी भारतीय समुदाया वतीन तुमकां सगल्यांत राम मूर्ती प्रतिश्ठापनेची परबीं ” अशें सांगलां.
33 वर्सां पिरायेच्या महाराजान देव तुमका सगल्यांक शांती आनी सद्बाभ दिवं अशें म्हणलां. ताचो व्हो व्हिडिओ भारतांत व्हायरल जाला. व्हिडिओत तो देवळांत पूजा करतना दिसता. टी-20 वर्ल्ड कपा निमतान भारतांत आयिल्ले कडेन तांणे देवळांनी वचून पूजा केल्ली. हे सर्ती पयलीं ताणे श्री पद्मनाभेश्वर देवळांत वचून पूजा केल्ली. तो मैदानार येता तेन्ना राम सिया राम पद लायता. केशव हनुमानाचो भक्त आसा. भारताच्या दक्षीण आफ्रिकेचे भोंवडे वेळार केपटावन टॅस्टी वेळार तो जेन्ना स्ट्रायक घेवपाक येतालो तेन्ना मैदानार राम सिया राम पद वाजतालें. त्या वेळार विराट कोहली लेगीत हात जोडटना दिसतालो.
भगवान म्हजे खातीर सगल्यात व्हडली ताकद आसा. ताका लागून मैदानार येतना डीजे बायलेक आपूण श्री रामाचे पद लावपाक सांगतालों. जैन्ना कितेंय बरें करपाचें आसता तेन्ना हांव हे पद म्हणटा. ताका लागून म्हजो आत्मविस्वास वाडटा. हांव धर्म आनी संस्कृतीचो मान राखता. स्टेडियमाचेर राम सिया राम लायतगीर बरें दिसता अशें ताणे सांगलें.
मजगतीं, सोमराक अयोध्येंत जावपी राम मूर्ती प्रतिश्ठापना सुवाळ्या खातीर स्पीनर अनिल कुंबळे आनी व्यंकटेश प्रसाद थंय पावल्यात. अर्द डझन क्रिकेटीयरांक ह्या सुवाळ्याचें आमंत्रण धाडलो. तातूंत सचीन तेंडुलकार, महेंद्र सिंग धोनी, विराट कोहली, रोहित शर्मा आनी रवींद्र जडेजाचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
