भांगरभूंय | प्रतिनिधी
बायलांचे संवसारीक टी-20 क्रिकेट सर्तीची फायनल आयज दक्षीण आफ्रिका आनी न्युझिलॅण्ड ह्या पंगडां मदीं जातली. दोनूय पंगडांक अजून मेरेन वस्तादपण फावो जावंक ना, ताका लागून नवो चॅम्पियन पळोवपाक मेळटलो.
पयले सेमी फायनलींत दक्षीण आफ्रिका पंगडान बळिश्ट ऑस्ट्रेलिया पंगडाक हारोवन सगल्यांक अजापाचो धपको दिल्लो, जाल्यार न्युझिलॅण्डान दुसरे सेमी फायनलींत वॅस्ट इंडिजा आड फकत आठ धांवड्यांनी जैत जोडिल्लें.
दोनूय पंगडां मदीं अजून मेरेन वट्ट 16 टी-20 मॅची जाल्यात. हातूंतल्यो 11 मॅची न्युझिलॅण्डान जिखल्यात, जाल्यार फकत चार मॅची दक्षीण आफ्रिकेन आपल्या नांवार केल्यात. आंकड्यांचेर नदर मारली जाल्यार न्युझिलॅण्डाचें दालें जड दिसता.
न्युझिलॅण्ड वट्ट तिसरे खेपे फायनलींत खेळटा. हाचे आदीं 2009, 2010तले संवसारीक सर्तीचे फायनलींत सुवात मेळयिल्ली. पूण, दोनूय खेपे ताका उप वस्तादपणाचेर समाधान मानचें पडिल्लें. जाल्यार दक्षीण आफ्रिका दुसरे खेपे फायनलींत पावला. फाटले सर्तीचे फायनलींत ताका ऑस्ट्रेलिया कडल्यान हार घेवची पडिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
