भांगरभूंय | प्रतिनिधी
कोण आडावंक आयलोच वा हरकत घेतलीच जाल्यार बोल्सांत इल्लें उडोवप!!
हडफड्यां जालें तें कल्पने भायलें आशिल्लें. गोंय मुक्ती उपरांत एकाच वेळार, एकेच कडेन इतल्या लोकांक मरण येवंक नासतलें. समेस्त गोंयकार अस्वस्थ जाल्यात. दर्यावेळांचेर नेमकें कितें चलता, ताचे आड दर दिसा व्हिडियो, लिखाण येता. कांय लोक तर तज्ञां सारक्यो सुचोवण्यो दितात. मात संबंदीत वेवसायीक, सरकारी यंत्रणा, पर्यटक त्यो कानामनार घेतातूच अशें ना. परिणाम हडफडें दुर्घटना. आतां अधिकाऱ्यांक निलंबीत केल्यात. राज्य आपत्कालीन वेवस्थापन प्राधिकरणान सगल्या वेवसायीक आस्थापनांक सुचोवण्यो केल्यात. त्यो सगले पाळटले, हाची खबरदारी घेवची पडटली. कारण आयज सगलेच बेफिकीर जाल्यात. ‘कांय जायना रे, पळोवया जाता तेन्ना’ असले तान लागतकच बांय खणपी वृत्तीचे लोक वाडत आसात. अपघात, दुर्घटनां पसून वाटावपाक साबार नेम पाळचे पडटात, ते ह्या क्लबाक खबर आशिल्लें? वेवसायीक ते पाळटात काय नात, तें कोणें पळोवप? कायद्यान जें कितें उपाय घेवंक जाय, तें घेनासतना हात ओले करून परवानग्यो घेवप्यांचो वा बेकायदेशीर पद्दतीन वेवसाय करप्यांचो आंकडो गोंयांत हिस्पा भायर वाडला. कित्याक तें सांगपाक नाका?
थळाव्या सरपंचान आनी हेरांनीय हो क्लब बेकायदेशीर आसा, तो मोडपाचो आदेश दिल्लो, पूण धनयान सरकारी यंत्रणे कडल्यान स्थगिती मेळयली, अशें सांगलें. सरपंच आपूण कसलीच परवानगी दिवंक ना, अशें म्हणटात. हो क्लब खंय मिठागराचेर उबारला. ताची रांदची कुडूय खंय तळघरांत आसा. फायर ब्रिगेडीक गाडी व्हरपाक वाट नाशिल्ली. वेवस्थापक, मुखेल अधिकाऱ्यांक अटक केल्या. क्लबाच्या धनयां आड गुन्यांव नोंद केला. एकलो धनी सौरव लुथराचीं देशभरांत हाॅटेलांची सांखळ आसा. गोंयांत दर्यादेगांचेर, दर्यावेळेंचेर जीं हाॅटेलां आसात, तातूंत गोंयकारांचीं कितलीं? थंय कितले गोंयकार काम करतात? ताचो आंकडो सरकारी यंत्रणेन जाहीर करपाक जाय. सुरक्षा वेवस्थे बगर वेवसाय करूंक दिवंक जायना.
आपल्या पंगडा वांगडा नाचपी कझाकिस्तानची बॅले डान्सर म्हणटा, ‘उजो लागतकच ती सकयल ग्रीन रुमांत धांवली, तेन्ना तिका एकल्यान थंयूय उजो लागला अशें सांगलें. सगले भायर पळून गेल्ल्यान वाटावले.’ 100 वयर पर्यटक आशिल्ले. जे जीव वाटावपाक सकयल तळघरांत धांवले ते धुंवरान घुस्मटून मेले. थंयच रांदचे कुडींत आशिल्ले सगले कूक, वेटर घुस्मटले, थोडे उज्यांत लासून मेले. भायर सरपाचीं दारां अशीर आशिल्ल्यान खेटाखेट जाली. ही सगली माची चुडटांची, प्लास्टीकाची आशिल्ली अशें कांय जाणांचें मत. थोडे म्हणटात, फोग मारलो, थोड्याचें मत शाॅर्ट सर्किट जालें. पूण, उजो कांय सेकंदां भितर फाफसलो, हें सत. तळघरांत गेल्ल्यांक जीव वांटावपाक हालचाल पसून करूंक मेळूंक ना. उजो पालोवपाची यंत्रणां, अॅम्बुलन्स, दोतोर नासतना क्लबांक कार्यावळ आयोजीत करपाक परवानगी कशी मेळटा?
दिल्लींत कांय वर्सां पयलीं थेटरांत उजो लागून प्रेक्षक मेल्ले. कार्यालयां वा हेर सगले कडेन तांबडे उजो पालोवपी उपकरण दवरिल्ले आसता. तातूंत गॅस आसता? ते कशे वापरपाचे ते कोणाक शिकयतात? ते कितल्या म्हयन्यांनी बदलतात? भायर वचपाचे मार्ग दवरल्यात काय नात हें कोण तपासता? गोंयचें पर्यटन स्वैर जालां. तातूंत कडकसाण, शिस्त ना. बांदकामां जातात थंय उजो पालोवपी गाडी पसून व्हरपाक मेळना. सगलेच फक्त पयशां फाटल्यान लागल्यात. कोण आडावंक आयलोच वा हरकत घेतलीच जाल्यार बोल्सांत इल्लें उडोवप!! ही दुडू संस्कृताय हुमटावन उडोवपाचो वेळ आयला.
आतां सगल्या वेवसायिकांचे परवाने, सुरक्षा वेवस्थेची तपासणी करतले. बेकायदेशीर आसात, तांकां घरा धाडचे. पर्यटकां खातीर सरकारान (आनी हेरांनीय) वेबसायटींचेर कागाळ विभाग सुरू करचो. कागाळीं प्रमाण उपाय घेवन वेवसायिकांचेर इल्लें तरी नियंत्रण
दवरपाक मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
