भांगरभूंय | प्रतिनिधी
तुजे शंबर गुन्यांव भरले. आतां तुका ख्यास्त करपा खेरीज पर्याय ना, अशें म्हणून श्रीकृष्ण शिशुपालाक ख्यास्त करता. महाभारतांतलो हो प्रसंग. हाचे वयल्यान ‘शिशुपालाचे शंबर गुन्यांव भरले’ अशी म्हण तयार जाल्या. केल्ल्या कर्माचीं फळां ह्याच जल्मांत भोगचीं पडटात, अशेंय महाभारतांत म्हणलां. बीड जिल्ह्यांतल्या मस्साजोगचे सरपंच संतोष देशमुख हांचे हत्ये बाबतींत अशेंच कांयशें घडलां. एकलो सोडल्यार सगले दुबावीत आनी तांचो सुत्रधार वाल्मीक कराड हाका अटक जाल्या. जामीन नाशिल्लो मोक्का कायदो तांकां लायला. काल कराड जाचो मुखेल वावुरपी आशिल्लो, त्या ग्राहक संरक्षण मंत्री धनंजय मुंडेक राजिनामो दिवचो पडलो. फाटले तीन म्हयने विरोधक तांच्या राजिनाम्याची मागणी करताले. तांकां आमदारकी सोडची पडटा काय ना, तें रोखडेंच कळटलें.
देशमुख हत्या प्रकरणाच्या तीन म्हयन्यां उपरांत ताका जीव वचसर बडयतनाचे फोटो प्रसार माध्यमांचेर व्हायरल जाले आनी दुसरे दीस काल मुंडे हांणी राजिनामो दिलो. तांचो राजिनामो घेवपा खातीरुय ते फोटो कोणे तरी प्रसारमाध्यमांक दिल्यात आसूं येता. भाजपाचे आमदार सुरेश धस हांणी ह्या प्रकरणाची फाटपुरवण केल्ली. तांचे म्हायती प्रमाण, ‘अवादा कंपनीचो मस्साजोगांत गुदांव आसा. थंय सुदर्शन आनी प्रतीक घुले हे भितर वतना वाॅचमनान तांकां आडायले. घुले आनी तांच्या वांगड्यांनी ताका बडयलो. सरपंच देशमुखाक कळटकच तो थंय गेलो आनी घुलेच्या कानपटार मारलें. उपरांत तीन दिसांनी देशमुखाक उबारून व्हरून सात- आठ जाणांनी पायपां, दांडे, हाॅकी स्टीक घेवन बडयलो. तीन वरां ते ताका मारताले. पायपाचे कुडके जायसर ताका बडयलो. तो उदक मागतालो, तें ताका दिवंक ना. ताचे कपडे पिंजले. लायटरान दोळे लासले. ताच्या फाटीर एकूय जागो नाशिल्लो जंय खत नाशिल्लें. तो आरडटालो तें रेकाॅर्ड केलें. ताच्या हड्ड्यार उबे रावन उडक्यो मारल्यो. मरतकच ताचे कुडीची विटंबणा केली……!! आतंकवाद्यां परस क्रूर पद्दतीन ताची हत्या केली.’ हाचे व्हिडियोय तांणी काडल्यात खंय. फकत एक थापट मारलें म्हूण इगो चाळवल्ल्यान हो मनीसपणाक खत लावपी भिरांकूळ प्रकार जालो. हाचे फाटल्यान मुंडे हांचो मुखेल वावुरपी कराड आसा. म्हूण ताका अटक केल्ली. तर आतां मुंडेन राजिनामो दिला. हांगा पयलीं सावन खंडणी वसूल करपाचे प्रकार घडल्यात. कितल्याशेच खून जाल्यात. देशमुख हांकां मारपी फरारी दुबाविताचोय खून जाला, असो विरोधकांक दुबाव. तांच्या मतान, हाका पुलिसूय जापसालदार आसात. तांणी बेगोबेग कागाळ नोंद करून घेतिल्ली जाल्यार हें सगलें घडचेंच नाशिल्लें.
सातत्यान जिखले आनी कायम सत्ताधारी पक्षांत रावले काय भ्रश्टाचार, गुन्यांवां पसून राखण मेळटा, अशें एक चित्र निर्माण जालां. आमच्या देशांत जायते लोकप्रतिनिधी अटक, बंदखण टाळपा खातीर आपूण कायम सत्ताधारी पक्षांत उरतलो, हाची खबरदारी घेतात. धपको दिवपी गजाल म्हणल्यार, तांचे सगले कारनामे खबर आसूनय मतदार तांकां वेंचून दितात. म्हणटकच लोकप्रतिनिधींच्या पापांत ताचे मतदारूय तितलेच सहभागी आसात. तांकां नामानिराळे रावंक मेळचें ना. मारपेटाचे फोटो व्हायरल जातकच उलोवंक नाशिल्ल्या लोकप्रतिनिधींक आतां कंठ फुटला. मुंंडें हांकां सहआरोपी करात, आदल्या घडणुकांचो तपास करात, असो आग्रो तांणी धरला. सगल्या दुबावितांक फांशीची ख्यास्त जावची, हे खातीर आतां कांय एनजीओ आंदोलन करपाच्यो आसात. सीआयडीन न्यायालयांत आरोपपत्र सादर केलां. खंयच्याय प्रकरणाचे पुरावे आसले तरी सामान्य नागरीक मुखार येवपाक भियेतात. तातूंत राजकी व्यक्ती घुस्पल्ली आसल्यार ती केश पोल जाता. चुकूनच कोणाक ख्यास्त जाल्ली पळोवंक मेळटा. धनंजय मुंडे, कराड हे सगले आतां राष्ट्रवादींत आसात. शरद पवार गटान तांचे आड आंदोलनूच उबारलां. कारण ते अजीत पवार गटांत आसात. पूण इतलीं वर्सां ते राष्ट्रवादींत आशिल्ले, तेन्ना मुंडेंच्या मतदारसंघांत कितें चलतालें, ताचे आड राष्ट्रवादीच्या कोणेच आवाज काडूंक ना. संतोष देशमुख प्रकरण जालें उपरांत मात खंडणी, गैरप्रकारांत घुस्पल्ल्यांचे एका परस एक भिरांकूळ कारनामे उजवाडांत येत आसात.
आतां एकामेकांच्यो जाती वयर काडून ह्या हत्या प्रकरणांत आरोप, प्रत्यारोप जातात. समाजांत, राजकारणांत जातीचो अहंकार वाडत आसा. जातीचें कार्ड खेळून फायदो कसो मेळटलो, हाचेय डावपेच सगलेच आंखीत आसात. तें कितेंय आसलें तरी आंगार कांटो हाडपी ह्या हत्याकांडांतल्या दोशींक कडक ख्यास्त जावपाकूच जाय. राजकी पक्षाचे फुडारी घुस्पल्ल्यान तपास यंत्रणेक हें प्रकरण चड जापसालदारकेन हाताळचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
