दोळ्यांच्या बुब्बुळाचेर चलपी व्हीलचेयर
भांगरभूंय | प्रतिनिधी
भोपाळ, खबरां संस्था ः IISER च्या भोपाळ इलेक्ट्रीकल इंजिनियरिंगाच्या चवथ्या वर्साचो विद्यार्थी मेहरन आनी ताचो इश्ट अभिषेक दास हांणी मेळून ‘आय- गेज कंट्रोल’ व्हीलचेयर तयार केल्या. फाटलीं दोन वर्सां सावन दोगांयनी ह्या स्मार्ट व्हीलचेराचेर संशोधन केलां. ही व्हीलचेयर दोळ्यांच्या नदरे प्रमाण काम करता. एका वर्सा उपरांत ही व्हीलचेयर बाजारांत उपलब्ध जातली अशें अभिषेक दास हांणी सांगले.
अभिषेक आनी मेहर हांचे संशोधन मार्गदर्शक सहाय्यक प्राध्यापक डॉ. सुरेश रैना हांणी सांगलें पांयानी दिव्यांग आशिल्ले लोक सामान्य व्हीलचेर हातान मुखार धुकलतात, जाका लागून तांच्या खांद्याच्या स्नायूंचेर ताण पडटा. पूण अर्धांग जाल्ल्या लोकांक हें करपाक मेळना. तांकां घरांतल्यांचेर कुणाचेर तरी आदारून रावचें पडटा, देखून तांच्या कुटुंबांकय त्रास जाता. देखून आमी एक मॉडेल तयार करपाचें थारायलें, जातूंत व्हीलचेराक बुब्बुळाच्या (आयरिस) हावभावान खंयच्याय सुवातेर व्हरूंक मेळटा. ह्या प्रकल्पाचेर हार्डवेअर आनी सॉफ्टवेअर ह्या दोनूय पांवड्यार काम सुरू जाला. दोळ्यांच्या हालचालीच्या आज्ञा प्रमाण चलप, थांबप, डावें-उजवें वळप, 360 अंश घुंवडावप, फाटीं वचप अशीं कामां करपाक शकता अशें सॉफ्टवेअर तयार केलां.
सेन्सर्स वरवीं आडमेळीं वळखुपाक शकता अशी पध्दत हे व्हीलचेयरांत तयार केल्या. समजा सोपणां, फोंडकुल, मनीस वा हेर खंयचीय घरगुती वस्त वांटेर मेळ्ळी जाल्यार ही पध्दत आपोआप व्हीलचेराक सुरक्षीत अंतराचेर थांबयता.
आयस कंट्रोल – मोबायल अॅपा वरवीं नियंत्रीत करूं येता
हांतूत व्हॉईस कमांड कंट्रोल आसतलें. ह्या खाशेलपणाच्या आदारान दिव्यांग मनीस उलोवन तें ऑपरेट करुंक शकतात. तशेंच मोबायल अॅपा वरवीं व्हील चेयराचेर नियंत्रण दवरूं येता. हाचो अर्थ कुटुंबांतलो वांगडी पयस आसतना लेगीत अॅपा वरवीं मजत करूंक शकता. हाच्या आदारान रियल टाईम डेटाय पळोवंक मेळटा.
एकाच चार्जाचेर 15 किलोमीटर चलतली…
व्हील चेयरांत 250 वॅट मोटर वापरला. दिव्यांग आशिल्ल्या मनशाच्या वजनाचेर आनी गरजे प्रमाण 500 वॅट मेरेन हें करूं येता. एकदा चार्ज केल्या उपरांत 15 किलोमीटर मेरेन चलोवंक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
