भांगरभूंय | प्रतिनिधी
स्व- राज संघटणेचो मांद्रेंकारांक उलो
भांगरभूंय । प्रतिनिधी
पेडणें: मांद्रें पंचायत वाठारांतली सैम सुंदरताय तिगोवन दवरचे खातीर तशेंच गांवची सर्वांगी उदरगत करचे खातीर नितळ आनी शिक्षीत उमेदवारांक वेंचून हाडपाची गरज आसा. हे खेपे मांद्रेंच्या सुजाण मतदारांनी दोळे उक्ते दवरून मतदान करचें. फाटली चूक परतून करची न्हय, असो उलो स्व-राज संघटणेन मारला. मांद्रें जिल्हो पंचायतीच्या सभाघरांत आयोजीत केल्ले पत्रकार परिशदेंत संस्थेचे पदाधिकारी उलयताले.
स्व-राज चळवळ मोहिमे खाला गांवांतल्या दरेका प्रभागांत वचून लोकां कडेन संपर्क केल्लो. स्व-राज स्थापनेचो उद्देश, विचार आनी संकल्पना हाचें पावर पॉयंट सादरीकरण केलें आनी लोकां मेरेन वचून तांच्यो भावना समजून घेतल्यो. आतां मेरेन दोन हजार लोकां मेरेन पावल्यात, 19 समाजोन्नती कार्यावळी जाल्यात. लोकांचो प्रतिसाद आनी तेंको उमेद वाडोवपी आसा. निसुवार्थी भावनेन वावर करपाचो निश्चेव लोकांनी उलोवन दाखयला. हे मजगतीं पंचायती वेंचणुको जाहीर जाले उपरांत गांवाची पोरणी वळख तिगोवन दवरप गरजेचें दिसलें. गांवांत बिगर गोंयकारांचें वजें, तांचे बेकायदो वेवसाय आनी तांकां तेंको दिवपी थळाव्या लोकांक परतून वेंचून हाडपाची चूक कितली म्हारग पडूं येता, हाचें म्हत्व पटोवन दिलें, अशें निमंत्रक अॅड. प्रसाद शहापूरकार हांणी सांगलें.
मतदारांनी कुसेंसाक धरून मतदान करचें. गांवचें घट्टण करपाक फुडें सरिल्ल्या उमेदवारांक घरा बसोवचे, असो उलो संदेश सावंत हांणी मारलो.
स्व-राज संघटणां फकत पंचायत राजकारणांत ना जाल्यार समाजीक, सांस्कृतीक, शिक्षणीक अशा विवीध मळांचेर वावर करतली, अशें वांगडी शंकर गोवेकार हांणी सांगलें.
संघटणे वतीन 14 ऑगस्टाक रक्तदान शिबीर आयोजीत केलां. मांद्रेंच्या तरणाट्यांनी तातूंत वांटो घेवचो, अशें तुषार गोवेकार हांणी मागलें. ह्या वेळार संघटणेचे वांगडी तशेंच आदले सरपंच विश्वनाथ शिरोडकार, आग्नेल फर्नांडीस, सहदेल मांद्रेंकार, रामचंद्र पालयेंकार, निलेश मांद्रेंकार हांणी विचार मांडले.
नितळ चारित्र्याचो उमेदवार वेंचातः जगन्नाथ पार्सेकार
स्व-राज संघटणेचो जल्म मांद्रें गांवाचें अस्तित्व तिगोवन दवरचे खातीर जाला. गांवांतल्या लोकां कडेन संपर्क केला आनी फाटल्या 5- 10 वर्सांत वेंचून आयिल्ल्या पंचां कडल्यान गांवाक धोको आसा हें तांकां पटोवन दिलां. लोकांच्या म्हणण्या प्रमाण गांवांत गांवांत बिगर गोंयकार व्हड प्रमाणांत घुसल्यात. तांचे बेकायदो वेवसाय, वेव्हार वाडल्यात. हे खातीर हे खेपे नितळ चारित्र्याच्या उमेदवारांक वेंचून दिवचे. जर कोणूय गांवचे आड वावुरता, बेकायदो तरेन उदरगत करता जाल्यार ही संघटणा लोकांक घेवन रस्त्याचेर देंवतली, अशी शिटकावणी ज्येश्ठ वांगडी जगन्नाथ पार्सेकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
