दोन ‘हीट अ‍ॅण्ड रन’

भांगरभूंय | प्रतिनिधी

दोन अपघातांत एकल्याक मरण, तीग जखमी

भांगरभूंय । प्रतिनिधी

फोंडें/ म्हापशें: बिरेस्तारा जाल्ल्या दोन हीट अ‍ॅण्ड रन प्रकरणांत एकल्याक मरण आयलें जाल्यार दुसरो जखमी जालो. हातूंतलो एक अपघात मोल्यां जाल्यार दुसरो शिरसय थिये जालो.

सुकतळी- मोल्यां बिरेस्तारा दनपारा अज्ञात गाडयेचो धपको बसून कर्नाटकांतलो दुचाकी चालक डेव्हीड खतनोलकर (25. रा. आगशी कुठ्ठाळी. मूळ हलियाळ- कर्नाटक) हाका मरण आयलें. कुळें पुलीस अज्ञात गाडयेचो सोद घेतात. जाल्यार हेर एका दुचाकीन वचपी दोग जाण रस्त्याचेर पडून जखमी जाले.

कुळें पुलिसांनी अपघाताचो पंचनामो केला. अपघातांत मरण आयिल्लो डेव्हीड खतनोलकर हो मे म्हयन्यांत लग्न जाल्लो.

मेळिल्ले म्हायती प्रमाण केए 65 एच 6278 नंबराची दुचाकी फोंडेंच्यान कर्नाटका वटेन वताली. सुकतळीच्या सरकारी मुळाव्या विद्यालया लागसार पावताच तेच दिशेन वचपी एका अज्ञात गाडयेचो धपको बसून डेव्हीड खतनोलकर रस्त्याचेर पडलो आनी तातूंत ताका मरण आयलें.

डेव्हीड खतनोलकर हो आगशे चालक म्हूण काम करतालो. बिरेस्तारा दनपारां दुचाकी वयल्यान वतना ताका अपघात जालो. अपघाता वेळार पळसकटा- मोलें सावन उसगांवां दुचाकी वयल्यान वचपी विनसेंट परेरा आनी विजयसिंग देसाय हे दोगूय रस्त्याचेर पडिल्ले दुचाकीक आपटून जखमी जाले. जखमींक तत्काळ पिळयेच्या मुळाव्या भलायकी केंद्रांत दाखल केले.

कुळें पुलीस अज्ञात गाडयेचो सोद घेतात. निरिक्षक राघोबा कामत हांच्या मार्गदर्शना खाला अपघाताचो पंचनामो केलो.

शिरसय घडिल्ल्या हीट अ‍ॅण्ड रन अपघातांतलो दुबावीत ट्रक चालक मंजुनाथ संगाप्पा कोटागोंडा (25, रा. बिजापूर- बेळगांव) हाका कोलवाळच्या पुलिसांनी अटक केली. ह्या अपघातांत जखमी दुचाकी चालक मंदार मंगलदास धुरू (22, रा. दाबोस- सत्तरी) हाचेर गोमॅकाँत उपचार चलतात.

हो अपघात सोमारा 21 ऑक्टोबराक फांतोडेर 3.20 वरांच्या सुमाराक कोमुनिदाद सभाघरा सामकार घडिल्लो. जखमी मंदार धुरी हो जीए 04 पी 9129 नंबराचे दुचाकी वयल्यान म्हापशेंच्यान अस्नोडेंचे दिशेन वतालो. वाटेर घडणुके सुवातेर अनवळखी ट्रकान उरफाटे दिशेन येवन ताचे दुचाकीक धपको दिलो. तातूंत दुचाकी चालक गंभीर जखमी जावन बेशुध्द जालो. उपरांत दुबावीत ट्रक चालकान थंयच्यान पळ काडिल्लो.

हे घडणुकेची म्हायती मेळटाच कोलवाळे पुलीस घडणुके सुवातेर पावले. अ‍ॅम्ब्युलन्सींतल्यान जखमीक उपचारा खातीर म्हापशें जिल्हो हॉस्पिटलांत व्हेलो. उपरांत ताका गोमॅकोंत व्हेलो. थंय ताचेर उपचार चालू आसात.

केए 22 एए 0804 नंबराचो ट्रक ह्या अपघाताक कारण आशिल्ल्याचें पुलिसांक चवकशे वेळर कळून आयलें. कोलवाळ पुलिसांनी शिरसय सावन पर्वरे मेरेन ह्या ट्रकाचो सोद घेतलो. तो ट्रक म्हापशें मार्केट सब यार्डांत आशिल्ल्याची म्हायती मेळटकच पुलिसांनी तो जप्त करून चालकाक अटक केली. फुडलो तपास पुलीस हवालदार अनिल पिळगांवकार करतात.