भांगरभूंय | प्रतिनिधी
भारत आनी दक्षीण आफ्रिका ह्या पंगडां मदीं सुरू जाल्ले दुसरे टॅस्टीचो पयलो दीस मिश्र थारलो. पयल्या दिसाचो खेळ सोंपलो त्या वेळार दक्षीण आफ्रिका पंगडान 6 विकेटी व्हगडावन 247 धांवड्यो केल्यो. पयल्या दोन सत्रांनी भारताक फकत दोनूच विकेटी मेळ्ळ्यो. पूण, अखेरच्या सत्रांत चार विकेटी घेवन तांणी उत्कृश्ट रितीन पुनरागमन केलें.
टॉस जिखून पयलीं बॅटींग करपाचो निर्णय घेवपी दक्षीण आफ्रिका पंगडान सामकी सादूर सुरवात केली. पयल्या वराच्या खेळांत एडेन मार्करम आनी रायन रिकल्टन हांणी कसलोच धोको घेवंक ना. पयलें सत्र पूर्णपणान दक्षीण आफ्रिकेच्या नांवार आशिल्लें. पयलें सत्र सोंपपाक कांय ओव्हरी बाकी आसतना मार्करमाच्या रुपान तांणी पयली विकेट व्हगडायली. मार्करम आनी रिकल्टन हांणी पयले विकेटी खातीर 82 धांवड्यांची भागिदारी केली. जसप्रीत बुमराचे बॉलिंगेचेर मार्करमाक दुसऱ्या स्लिपांत एक जीवनदान मेळिल्लें.
सत्र सोंपचे पयलीं मुखेली ऋषभ पंचान अखेरची ओव्हर बुमराक दिली. ताणें पांचव्या बॉलाचेर मार्करमाक (38) बोल्ड करून भारताक मात्शी थाकाय दिली.
दुसरें सत्र सुरू जाल्या उपरांत दुसरेच ओव्हरींत कुलदीप यादवान खेळपट्टीचेर जम बसयिल्लो दुसरो बॅट्समन रिक्लटनाक (35) बाद केलो. ह्या दोन विकेटी उपरांत मुखेली टेम्बा बवुमा आनी त्रिस्टन स्टब्स हांचे मदीं एक बरी भागिदारी दाली. ह्या दोगांयनी दुसऱ्या सत्रांत आपल्या पंगडाक आनीक धपके बसपाक दिले ना.
दुसरें सत्र सोंप मेरेन दक्षीण आफ्रिकेची स्थिती बरी घटमूट जाल्ली. तथापी, तिसऱ्या सत्रांत मुखेली बवुमा व्हड शॉर्ट खेळपाच्या यत्नांत रवींद्र जडेजाचो शिकार थारलो. 41 धांवड्यांची खेळी करून तो बाद जालो. ते मेरेन तिसऱ्या विकेटी खातीर स्टब्सा वांगडा ताची 84 धांवड्यांची भागिदारी जाल्ली. कांय वेळांत कुलदीप यादवान स्टब्साक (49) बाद केलो. ताका फक्त एके धांवडेन अर्द शेंकडो चुकलो. वियान मुल्डराक (13) लेगीत कुलदीपान आपलो शिकार केलो.
ते उपरांत टोनी डी झॉर्झी आनी मुथुस्वामी हांणी भारताच्या बॉलरांक नाकापुरो केल्यो. तांणी सुमार 15 ओव्हरी खेळून काडटना 45 धांवड्यो केल्यो.
80 ओव्हरी पूर्ण जाल्या उप रांत भारतान दुसरो नवो बॉल घेतलो आनी ताचो तांकां फायदो जालो. नवीन बॉलान घाल्ले आफल्या स्पेलाचे पयलेच ओव्हरींत मोहम्मद सिराजान डी झॉर्झीक बाद केलो. पंतान ताची विकेटी फाटल्यान कॅच धरली. ते उपरांत फकत चारूच बॉल घाल्या उपरांत अंपायरांनी लायट मिटर भायर काडलो आनी दिसाचो खेळ सोंपिल्ल्याची घोशणा केली. 26.5 ओव्हरींच्या अखेरच्या सत्रांत भारताक चार विकेटी मेळ्ळ्यो. ताका लागून भारताचें बरे तरेन पुनरागमन जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
