भांगरभूंय | प्रतिनिधी
आनीक दोगां भुरग्यांक मरण
नवी दिल्ली, खबरां संस्था: मध्य प्रदेशांत शुक्रारा आनीक दोन भुरग्यांक मरण आयलें. मध्य प्रदेशा सयत राजस्थानांत फाटल्या 24 दिसांनी खोंकलेच्या वखदांक लागून 11 भुरग्यांक मरण आयलां. मजगतीं, केंद्र सरकारान राज्यांक आनी हेर राज्यांक सल्लो जारी करून दोन वर्सां सकयल्या भुरग्यांक खोंकली आनी थंडेचीं वखदां दिवचीं न्हय अशें सांगलां.
भलायकी मंत्रालयाच्या खाला येवपी भलायकी सेवा महासंचालनालयान हो सल्लो जारी केला. पांच वर्सां सकयल्या भुरग्यांक खोंकलेचीं वखदां दिवप गरजेचें ना अशें तातूंत म्हणलां. दिल्यार दोतोराच्या सल्ल्यान योग्य प्रमाणांत, सगळ्यांत उण्या काळा खातीर आनी वखदांचो एकूच वापर करून दिवचो. नॅशनल सेंटर फॉर डिजीज कंट्रोल, नॅशनल इन्स्टिट्यूट ऑफ व्हायरोलॉजी आनी सेंट्रल ड्रग्स स्टँडर्ड्स कंट्रोल ऑर्गनायझेशनाच्या पंगडांनी मध्य प्रदेशांतल्यान वेगवेगळ्या खोंकलेच्या शरपींचेे नमुने एकठांय केल्यात अशें केंद्रीय भलायकी मंत्रालयान सांगलां. तातूंतल्या खंयच्याच एका मनशाक डायथिलीन ग्लायकोल वा इथिलीन ग्लायकोल नाशिल्ल्याचें दिसून आयलें, ह्या दोनूय प्रकारांक लागून मुत्रपिंडाचें गंभीर लुकसाण जाता. मध्य प्रदेश राज्य अन्न आनी वखदां प्रशासनानूय तीन नमुन्यांची चांचणी करून डीईजी/ईजी नाशिल्ल्याची खात्री केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
