भांगरभूंय | प्रतिनिधी
पणजी : गोंयांत ऑगस्ट 2023 ते सप्टेंबर 2025 ह्या काळांत शिक्षकां कडल्यान विद्यार्थ्यांक मारबडय करपाच्यो 12 घडणुकांची नोंद जाल्या. तातूंतलीं 8 प्रकरणां हायस्कूल, 4 मुळाव्यो शाळा जाल्यार एक उच्च शिक्षण संस्थेंतलीं आशिल्लीं. तातूंतल्यो 8 घडणुको अनुदानीत शिक्षण संस्थांतल्यो जाल्यार 4 सरकारी शाळांतल्यो आसात. हातूंतल्या चडश्या प्रकरणांनी शिक्षण खात्या वतीन चवकशी पुराय जाल्या आनी संबंदीत शिक्षकांचेर कारवाय केल्या. जाल्यार दोन प्रकरणांची चवकशी चालू आसा.
मेळिल्ले म्हायती प्रमाण, ऑगस्ट 2023 त नामोशी गिरीच्या सरकारी मुळावे शाळेंतल्या विद्यार्थ्याक मारबडय केल्ल्याची कागाळ आयिल्ली. ह्या प्रकरणांत कागाळदार चवकशेक येवंक नाशिल्ल्यान शिक्षिकेक निर्दोश थारायिल्ली. नोव्हेंबर 2023 त विठ्ठलापूरचे मुळावे शाळेंत मारबडयचे कागाळी बाबतींत शिक्षकाक निर्दोश थारायलो. ऑगस्ट 2024 त श्रीस्थळ काणकोणचे सरकारी शाळेंत जाल्ले मारबडयचे कागाळेंत तथ्य नाशिल्ल्याचें दिसून आयलें.
सप्टेंबर 2024 त कामुर्लेचे अनुदानीत मुळावे शाळेंतल्या विद्यार्थ्याक मारबडय केल्ल्या प्रकरणांत कंत्राटी शिक्षकाच्या निलंबनाचो आदेश जारी केलो. डिसेंबर 2024 त बड्डें मडगांवच्या सरकारी उच्च माध्यमीक शाळेंत जाल्ले मारबडय प्रकरणांत शिक्षिकेची खात्यांत दुसरे कडेन बदली केली. डिसेंबर 2024 त खोर्जुवेचे अनुदानीत शाळेंत जाल्ल्या मारबडय प्रकरणांत चवकशी करपाचे आदेश शाळा वेवस्थापनाक दिल्यात. ते भायर 2025 त म्हापशें, कुचडचें, सेंट इस्तेवाम सांगें, काणकोणचे अनुदानीत माध्यमीक शाळेंत विद्यार्थ्याक मारबडय करपाच्या घडणुकांची नोंद जाल्या. दोन प्रकरणांत चवकशी चालू आसा. जानेवारी 2025 त जाल्ल्या एका प्रकरणांत शाळा वेवस्थापनान शिक्षकाची पगारवाड आडयल्या, तशेंच ताका दंड दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
