भांगरभूंय | प्रतिनिधी
-जिणेचो भरवंसो ना: सुदीन ढवळीकार पणजीः विधानसभा वेंचणुकेक अजून दोन वर्सां उरल्यात. ह्या दोन वर्सांत आपूण आसतलो वा ना हें सांगप शक्य ना. जिणेचो भरवंसो ना, अशें वीज मंत्री आनी मगोचे वरिश्ठ फुडारी सुदीन ढवळीकार हांणी पत्रकारां कडेन उलयतना सांगलें.
सध्या भाजपान सगल्या चाळीस मतदारसंघांनी काम सुरू केलां, आनी प्रदेशाध्यक्ष दामू नायक हांणीय येवपी विधानसभा वेंचणुकेंत सगल्या चाळीस मतदारसंघांनी लढो दितले अशें जाहीर केलां. हाचो परिणाम विधानसभा वेंचणुकेंत भाजपा-मगो युतीचेर जातलो काय कितें असो प्रस्न पत्रकारांनी सुदीन ढवळीकार हांकां विचारिल्लो. ताचेर उलयतना तांणी सांगलें, विधानसभा वेंचणुकेक अजून दोन वर्सां उरल्यात. ह्या दोन वर्सांत हांव आसत वा नासत तें कळना. जिणेचो भरवंसो ना. हांव जिवो आसत जाल्यार हांव राजकारणांत आसतलों.
मजगतीं, मगो उमेदवार आशिल्ल्या मांद्रेंत येवपी विधानसभा वेंचणुकेंत भाजप उमेदवार उबो करतले अशें जाहीर केल्या उपरांत मुख्यमंत्री डॉ. प्रमोद सावंत हांणी प्रियोळांतूय भाजपाचो उमेदवार आसतलो अशें स्पश्ट केलें. ही गजाल मान्य नाशिल्ल्यांनी आतांच वच्चें अशेंय तांणी स्पश्ट केलें. हाचे वयल्यान भाजपा-मगो युतींत फूट पडल्या अशें स्पश्ट जालें. ह्या घडणुके उपरांत सुदीन आनी दीपक ढवळीकार भाव दिल्लीक गेले आनी भाजपाचे राष्ट्रीय सरचिटणीस बी.एल. हांकां मेळून तांणी युती विशीं चर्चा केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
