भांगरभूंय | प्रतिनिधी
म्हजें मत
आमच्या नळाच्या उदकाक घाण येता म्हणून आमी 22 सप्टेंबरच्यान नळाचें उदक घेवपाचें बंद केलां आनी फाटले दोन म्हयने आमी सकाळ – सांजवेळ बिसलेरीचें उदक हाडून उदकाची गरज भागयतात. असिस्टंट अभियंत्यांक सांगून पळयलें, कार्यकारी अभियंत्यां कडेन लेखी कागाळ केली, आमदार आलेक्स रेजिनाल्ड लाॅरेन्स, पियेवपाच्या उदकाचे मंत्री सुभाष फळदेसाय आनी खासदार कॅप्टन विरियातो फर्नांडीस हांच्याय कानार घालें. खासदारान 6 नोव्हेंबराक प्रत्यक्ष येवन भेट दिली, परिस्थितीचो नियाळ घेतलो आनी खंय दोश आसा तो कार्यकारी अभियंते सोदून काडून तुमचो प्रस्न सोडयतलो अशें सांगलें. पूण अजून आमच्या उदकाचो प्रस्न सुटूंक ना. उदकाक तशीच घाण येता आनी सांजवेळ जाता म्हणल्यार वाडत वता.
संबंदीत खात्यान 25 सप्टेंबर, 30 सप्टेंबर आनी 3 आॅक्टोबर अशे तीन फावटी उदकाचे नमुने व्हेले आनी ‘उदक सेफ टू ड्रिंक’ म्हणून रिपोर्ट दिलो. ‘जे मेरेन उदकाक घाण येता अशें रिपोर्ट सांगिना ते मेरेन आमी कांयच करूंक शकनात’ अशें सहाय्यक अभियंते सांगतात, पूण नळाच्या उदकाक घाण कशी येता हें मात सोदून काडिनात. ‘तुमच्या उदकाक घाण येता जाल्यार हेर सगल्या लोकांक येवंक जाय. अशें जावंकूच शकना.’ अशें सांगून सहाय्यक अभियंते आमचेर विस्वासूच दवरूंक तयार नात. नळाचें उदक बरें आनी निवळ आयिल्लें जाल्यार भायलें उदक हाडून आलायतो खर्च करपाची आमकां कसली गरज आसली? भायलें खाण – जेवण खावन आमचे भलायकेचेरय परिणाम जाला. अभियंते दोश सोदून काडूंक कित्याक टाळाटाळ करतात तेंच कळना.
सगल्या संबंदीत अधिकाऱ्यांक आमची अडचण सांगून पळयली, पूण कोणाकूच खरें दिसना. आतां कोणाक सांगपाचें? मुख्यमंत्री डाॅ. प्रमोद सावंत वा भलायकी मंत्री विश्वजीत राणे हातूंत लक्ष घालून आमची उदकाची ही अडचण पयस करीत काय?
– अतुल र. पंडित
मडगांव.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
