भांगरभूंय | प्रतिनिधी
पणजीः ताळगांव मतदारसंघांतल्या हवाई गांवांतल्या थळाव्यांचे उदकाक लागून बरेच हाल जाल्यात. ह्या गांवांतल्या नळांक फाटल्या दोन दिसां सावन उदक येना. ते सुक्यार पडल्यात. पयलीं ह्या गांवाक थारावीक एका वरा खातीर उदक येतालें. मात तेंय आतां बंद जाल्ल्या कारणान थळाव्यांक बरेच त्रास सोंसचे पडटात. ताळगांवां व्हडलीं व्हडलीं बांदकामां येतात. पूण थळव्यांक धड उदक मेळना, असो आरोप थळाव्यांनी केला.
ताळगांव मतदरासंघांत झुवारी न्हंयेक तेंकून हवाई बीच नांवाचो एक ल्हान सोबीत गांव आसा. ह्या गांवचे लोक फाटल्या कितल्याशाच वर्सां सावन उदकाक लागून वनवास काडटात. पयलीं तांकां केन्नाय थारावीक वेळ नासतना अचकीत सांजेवेळार वा दनपरां उदक येतालें. तातूंतच हांगचे थळावे कशेबशे दीस काडटाले. मात दोन दीस उदक येवचें बंद जाल्ल्यान थळावे भौशीक बांदकाम खात्याच्या उदका विभागांत व्हाणो झरयतात.
हे विशीं उलयतना थळावी समाज वावुरपी सेसील राॅड्रीग्स हांणी, मुख्यमंत्री उदका पुरवण करपाची घोशणा करता. पूण ती पुराय करपाक अपेशी थारता.
२०१९च्या अर्थसंकल्पीय भाशणांत मुख्यमंत्र्यान २४ वरां उदक दिवपाचें आश्वासन दिल्लें. परत तातूंत बदल करून फेब्रुवारी २०२५ त उण्यात उणीं ४ वरां उदक दिवपाचें आश्वासन केलां. मात २०२५ त २ दीस उदक येना ही गजाल लजेची जावन आसा, असो आरोप तांणी केलो.
थंयच्या थळाव्यांनी जगप तरी कशें? दर खेपे उदक येना म्हण बांदकाम अधिकार्यांक फोन मारचो पडटा अशें राॅड्रीग्स हिणें सांगलें. ह्या गांवांक अचकीत केन्नाय उदक येता. केन्ना दनपरा दोनांक ना जाल्यार सांजेच्या ४ आनी ५ वरांचेर फक्त एक वरां खातीर उदक येता. लोक सांजेच्या ७ मेरेन उदकाची वाट पळयत रावले. पूण तांकां पुरवण जावंक ना. ताळगांवां बांदकाम प्रकल्प नेटान येत आसात. मात जे थळावे १०० वर्सां हांगासर राबीतो करून आसात तांकां उदकच ना, अशें राॅड्रीग्स हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
