भांगरभूंय | प्रतिनिधी
मोपा विमानतळा वयल्या टॅक्सी वेवसायिकांची शिटकावणी
भांगरभूंय । प्रतिनिधी
पेडणें : मोपा विमानतळा वयलो ब्ल्यू कॅप टॅक्सी स्टॅण्ड फाटल्या दोन म्हयन्यां सावन जीएमआर कंपनीन बंद केला. तो दोन दिसां भितर सुरू केलो ना जाल्यार रस्त्याचेर देंवून आंदोलन करतले. त्या वेळार कसलीय वायट घडणूक घडली जाल्यार ताका आमी जापसालदार आसचे नात, अशी शिटकावणी ब्ल्यू कॅप टॅक्सी स्टॅण्ड असोसिएशनाच्या वेवसायिकांनी दिल्या. तांणी नागझर वाठारांत पत्रकार परिशद घेतिल्ली.
सरकारान मोपा विमानतळाचेर ब्ल्यू कॅप टॅक्सी स्टॅण्ड उपलब्ध करून दिल्लो. ब्ल्यू कॅप टॅक्सी स्टॅण्ड संघटणेन सेक्युरिटी क्लियरन्स नेम पाळूंक नाशिल्ल्याचें कारण दिवन दोन म्हयन्यां आदीं तो बंद केल्लो. अशी म्हायती टॅक्सी वेवसायीक विनेश गांवस, आनंद गांवस, संघटणेचे अध्यक्ष संदीप कांबळी हांणी दिली.
येरादारी खात्यान टॅक्सी वेवसायिकांक मोपा विमानतळा वयलो ब्ल्यू कॅप टॅक्सी स्टॅण्ड लिजाचेर घेवन तो आमचे सुवादीन दिवन आमकां न्याय दिवचो. ते खातीर आमी सरकाराक निवेदन लेगीत सादर केलां, अशें टॅक्सी वेवसायिकांनी सांगलें.
दोन म्हयन्यां सावन टॅक्सी स्टॅण्ड बंद आसा. ताका लागून आमकां भाडी मेळना. बँकेचे हप्ते दोन म्हयने जाले भरूंक नात. तिसरो म्हयनो असोच गेलो जाल्यार बँको गाडयो ओडून व्हरतले, अशी भिरांत ह्या वेळार विनेश गांवस हाणें उक्तायली.
आनंद गांवस हाणें सांगलें, मोपा विमानतळा खातीर जांच्यो जमनी गेल्यात, तांकां अजून न्याय मेळूंक ना. सरकार थळाव्या लोकांचेर अन्याय करता आनी बिगर गोंयकारांक प्राधान्य दिता. संदीप कांबळी हाणें सांगलें, दोन म्हयन्यां सावन स्टॅण्ड बंद आसा. दोन म्हयने बँकेचे हप्ते भरूंक नात. तिसऱ्याय म्हयन्याचो हप्तो भरलो ना जाल्यार बँको गाडयो ओडून व्हरतले. सरकारान आमकां तीन म्हयन्यांची लुकसाण भरपाय दिवची आनी बेगिनात बेगीन स्टॅण्ड उपलब्ध करून दिवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
